Shillong, Naitung 08: Ka Mawkynrew Cup Committee ha ka 7th July 2018 kala pynhap pyrda noh ia ka Referees Workshop kaba arsngi kynthih ia kaba la plie pyrda ha ka 6th July 2018. Ka Mawkynrew Cup Committee kala pynlong ia katei ka Workshop kum shibynta ban pynkhreh pynkhrum ia ka 2nd Mawkynrew Cup 2018 ia kaba yn sa sdang shen ha kine ki khyndiat bnai kiban sa wan.
Ha katei ka workshop la wan ban ia shim bynta shitrhem da 30 ngut ki khun samla kiba shong hapoh u pud u sam jong ka Mawkynrew Constituency ha kaba na ka liang jong ki Resource person kiba kynthup ia i Bah Ricky Marshal Synnah u I Bah Lightstar Kharduit – Asst. Instructor kila ai ia ki jinghikai kiba pher bapher kiba kynthup ia ki Ain ki Kyndon kiba kum ki Referees ki dei ban tip bad kumjuh ruh ia ki Skills kiba pher bapher kynthup ruh ia ka jing donkam ban don ia ka met kaba shait kaba khlain.
Ha katei ka sngi la ia don ryngkat ruh da ki Officials jong ka Mawkynrew Cup Committee kiba kynthup ia I Bah Tympang Pohshna, Chief Coordinator, MCC lem bad kiwei kiwei bad ha katei ka sngi na ka liang jong ka MCC kala sam ruh da ki Certificate bad T- shirt sha baroh ki nong wan shim bynta ha katei ka workshop lyngba jong ka Kongrit Amanda A Pakyntein, President Source Of Hope (S.O.H) iba la long kum I kongsan ha katei ka sngi.
Haba kren kum I Kongsan ha katei ka sngi na ka liang jong I Kongrit Amanda A Pakyntein I la ai khublei kitbok kitrwiang ia baroh ki nong wan ia shim bynta ha katei ka workshop ha kaba i la kyntu ruh ba ki jinghikai kaba ki la ioh ha kine ki ar sngi kim dei satia ban long lehnohei, shuh shuh na ka liang jong I Kongsan i la ai khublei kyrpang ia ka School Holy Cross kiba la shah sngewbha ban pyndonkam ia ka hall bad kumjuh ruh ia ka madan I la ai khublei kyrpang ruh ia i Bah Ricky M Synnah i ba la pyllait por khnang ban wan ai ki jinghikai kaba kyrpang ia ki khun samla jong ka thain.
