Shillong, Jymmang 07: U Heh pulit jong ka East Khasi Hills District u DNR Marak, ha ka jingpynlait khubor mynta ka sngi na ka tnad pulit u la ong ba ha ka jingshem jong ki pulit ba bun na ki nongkhaii drugs ha kane ka nongbah Shillong ki pyndon kam ia ki iing shong wai. Maham ki pulit, kiba aiwai iing sha ki nongkhaii drugs ki trai iing ruh ki lah ban ngatlang.
Haba ia dei bad kane na ka liang jong ki pulit kila bethah ia ki trai iing ba kin long kiba phikir ha kaba ai wai iing lane ba kin pyndon kam ia ka iing jong ki na ka bynta kane ka kam khaii drugs. Na ka liang jong ki pulit ki maham ia ki trai iing ban nym ai wai iing sha ki nongkhaii drugs lada lap ki trai iing ruh kin ngat lang ha ki kyndon jong ka ain.
Ban ia khun pyrshah ia ki nongkhaii drugs kiba la jyllei bha ha kane ka nongbah Shillong na ka liang jong ki pulit kila kyntu ia ki paidbah ba kin ia treilang bad ki pulit ban rat ia kane ka jingsniew.
Ha kine ki sngi da ka jingtrei shitom jong ki pulit kila ioh bankem bun ki nongkhaii ganja bad ki nongkhaii drugs na ki bun tylli ki jaka jong kane ka nongbah Shillong. Ha kane ka jingiakhun ia ki nongkhaii drugs ki pulit kila ioh ban kem ruh bun ki briew kiba la suba ba ki trei ia kane ka kam.
