Shillong, Jymmang 28: Ki paidbah nongthep but jong ka 53-Ampati Konstitwensi kila pyndep ia la ka kamram jong ki ban thep ia ka but ba jar jar ka jong ki mynta ka sngi bad u ei ban jop ha kane ka election kan long sa tang ha ka bok bad ka nusip jong ki kyrtong pynpaw kiba bun na ki nongthep but.
Ka jingpoi jong ki nongthep but ban thep ia ka but jong ki haduh 90.42% ha ka jingiathep mynta ka sngi kala buh ia ki ar tylli ki seng sain pyrthei ha ka jingeh kaba khraw ha kaba kin nym lah shuh ban shim ia ka jingkhein namar ka rai ka shnong u ne ka kiba leit ban thep jar jar ia ka but jong ki.
Wat la ka ha kane ka jingiakhun ia ka elekshon shiteng samoi ka long ha pdeng ki lain gut ki kyrtong, kata ka Miani D Shira jong ka seng Congress, u Clement G Momin jong ka seng NPP bad u Subhankar Coach kum u kyrtong shimet.
Wat la ki don lai ngut ki kyrtong ka jingiakhun ka long ha pdeng u kyrtong ka NPP bad ka kyrtong jong ka seng Congress. Bun na ki nongpeit pyrman kila pynsngew ba kane ka election ban ong mano ba jop yn nym lah shuh ban khien namar ka jingpoi bun palat ki nongthep vote ia kaba ym shym la poi pyrkhat ba kin poi palat ia ka 90%.
