Shillong, Kyllalyngkot 17: U bah Donboklang Kharlyngdoh nongialam jong ka seng HYC, u la ong ba kane ka jingkhot hajir ia ki mynta ka sngi ka long ban pyntieng khoh tympan ia ki nongialam, hynrei kane kan nym pyntieng ia ka mynsiem ialeh.
Haba kren ha ki lad pathai khubor ha dien ba la dep ban shah khot hajir u la ong “Nga la wan khnang kumne da ka traksut namar nga long ba la kloi ban shong patok, la iathuh ba la pyngat haduh 50 tylli ki kyndon, hynrei ai shuh ia ki kyndon ban im ka jaidbynriew”.
La iathuh ba kane ka jingkhot mynta ka sngi ka long halor ka jingjia ha ka 13th Nohprah 2019 ha khmat iing jong u Lat ka jylla, u la ong ba ka jingiakhun kam dei bad ki pulit ne ki bor sorkar hynrei ka jingia khih ka long ban dawa ia ka ILP, kane ka jingleh ki pulit ki pyndep ia ka kamram jong ki.
Ha kane ka jingshah khothajir mynta ka sngi ka long ruh ia u president ka HANM u bah Lamphrang Kharbani. U tei u nognialam jong ka HYC u la ong ba kane ka jingleh kan nym lah ban pyntieng ia ka mynsiem ia khun ka jong ki. La ong bal eh se kan long ka khana pateng ha ka jingialeh ban dawa ia ka jaidbynriew kaba ka CoMSO kala leh.
La ong ba wat ka party Congress kala pyrshah iaka ILP hynrei da ka jingiakhih jong ka CoMSO kala pynlong ia katei ka party ban kyrshan ia ka jingdawa ia ka ILP bad la ai khublei ia ka baroh ki MLA kiba la pdiang ia ka jingdawa ILP kaba dei ka jingdawa jong ki paidbah.
U bah Lamphrang Kharbani President u la ong ba ka HANM ka seng ryngkat bad ka CoMSO ka long ban dawa ILP, kane ka jingleh ka sorkar ka long ba ha ka jaka ba kan pyntieng hynrei kane ka jingshah khot hajir ka long kum ka jingai mynsiem ia ki dkhot ka seng ban dang kham ai mynsiem ban ia leh na ka bynta ka jaidbyrniew.
Haba ia dei bad ki jingkynnoh ba la don ba ai jingkyrshan na dien na ka liang jong u bah Lamphrang u la ong ba kam don kum kata bad kim don kam hiruh ia kum katta namar haba ki sngew khia ia ki mat kiba ktah ia ka jaidbynriew ki ia sei hi na ka bynta ka daw bah jong ka jaidbynriew.
