Shillong, Nailar 14: U Bah M.A Neng Chairman Central Disciplinary Committee jong ka KHNAM, mynta ka sngi u la phah da ka jingthoh sha u MDC jong ka party u bah James Ban Basaiawmoit halor ka jingmih khubor ba un ia khun ia ka MLA Election ha u snem 2018 na ka seng PDF.
Ha kane ka shithi u Bah Neng u la thoh ba “ka jingmih khubor lyngba ka “Batesi tv” la iohi ba phi la pynpaw ia ka jingmut jong phi ban iakhun ia ka election MLA 2018 na ka seng PDF, Ka seng kam lah ban khanglad ia ka jingthmu laitluid jong phi, hynrei ka jingpynpaw jong phi ia ka jingthmu ban ia don bynta bad ka PDF, khlem da pynshai sha ka seng ka long ka jingpynkhien ia ka artikil XIX (f) jong ka riti synshar jong ka seng”.
Ka jingbym poi tista jong phi sha ki meeting jong ka seng kala khanglad ia ka seng ban pan jingshai na phi ha kiba bun ki bynta, bad ka long ruh ka jingpynkhien ia ka artikil XX (3) jong ka riti treikam jong ka seng.
Halor ka jingkren jong phi ba “Kat dang mih ki snem ki bnai ki paidbah kim shaniah ia ka seng” ka long ka jingpyrshang ban ialam bakla jong phi ia u paidbah. Namar kata kum u wei na ki Para nongialam jong ka seng ka committee ka kwah ban pynkynmaw ia phi ba ha ki por ba la liet phi la ia khun ia ka election naka PDM bad naka Congress, hynrei phi khlem lah ban poi sha ka thong, dei tad hadien ba phi la pyniasoh ia lade bad ka KHNAM ban ia khun ia ka Election, u paidbah u la ai ka jingjop ia phi.
Hadien kata phi mih noh na ka KHNAM bad pyniasoh noh ia lade bad ka UDP, hadien kata ruh phi la wan phai biang sha ka KHNAM ban ia khun ia ka Election 2014 bad u paidbah ka 18th – Mawkhar-Pynthorumkhrah Constituency u la ai ka jingkyrshan ba pura ia ka KHNAM daka ba pynjop don burom ia phi.
Ka Committee ka kyntu ia phi ban pynshai lyngba ka jingthoh halor ki jingkren jong phi kiba la mih ha ka “Batesi tv” kumba la kdew haka para 1 (a), (b) & (c) haneng bad ruh ban pynshai balei ka seng kan ym shim ia kano kano ka rai pyrshah ia phi kum u dkhot jong ka seng, halor ki jingpynkhien jong phi ia kyndon jong ka riti synshar ka seng. La kyrpad ia phi ban pynpoi ia ka jingpynshai sha office jong ka seng katkum ka por bala buh ha ka riti synshar ka seng. Ong u Bah M A Neng ha ka kyrwoh kaba la phah mynta ka sngi.
