Shillong, Lber 23: Mynta ka sngi ka iing dorbar thawain ka jylla Meghalaya kala pdiang ia ki 31 tylli ki grant ba ka sorkar ka pan pisa shuh na ka iing dorbar ban pynlut ha ki jingdon kam ki tnad sorkar hapoh ka 31/Lber 2023.
Ka jingpan pisa shuh ka sorkar na ka iing dorbar ka long ba kaei kaba la mang ha ka mangtyngka kam shym la dap ban siew ia ki jinglut jingsep kaba ki tnad sorkar bapher kila hap ban pynlut na ka bynta ka jingdon kam hapoh ka tnad sorkar, ban pynbeit ia ka jinglut ka sorkar kala pan pisa shuh na ka iing dorbar.
U myntri rangbah ka jylla u Conrad K Sangma ha ka jingpan pisa shuh ka number kaba lai ha kaba ia dei bad ka election sha ka iing dorbar thawain ka jylla kaba dang shu dep shem ban siew ia ki jinglut jingsep baroh u myntri rangbah ba dei peit ruh ia ka tnad election la pan pisa shuh sa T.62,62,61,609 klur tyngka.
U Myntri ba dei peit ia ka tnad karkhana ha ka jylla u bah Sniawbhlang Dhar, ha ka jingpan pisa shuh na ka iing dorbar sa T.6,76,92,000/- klur tyngka, ban siew ia ka tulop jong ki nongtrei ka Mawmluh Cherra Cement Limited, ia kane ka pisa la dang pynsiew na ka Contingency Fund bad mynta hap ban pynbeit ia kane jingpynlut.
Ka iing dorbar thawain kala pdiang ia ka mang tyngka kaba kot sha ka T.16690,16,14,000/- klur tyngka, namar ba kam dap kumba la pdiang nyngkong da ka iing dorbar kumta ka sorkar kala pan pisa shuh na ka iing dorbar sa T. 1240,25,33,516/- bad mynta ka sngi ka iing dorbar kala pynlait biang ia ka pisa T.1780,87,32,659/- klur tyngka bad ka jinglut kaba ka sorkar kan pynlut haduh ka 31/Lber/2023 kan long T.19711,28,80,175/- klur tyngka.
