Shillong, Jymmang 28: U MLA jong ka 21-Nongthymmai Konstitwensi u bah Charles Pyngrope u la thoh da ka shithi sha u Bah Metbah Lyngdoh shongknor ka iing dorbar thaw ain ka jylla ban kyntu ia ka ophis ba kan khate 50% ka tulop MLA bad ai sha ka sorkar.
Ha kane ka shithi kaba u la thoh u la ong ba baroh ia tip ba ka sorkar ka ia leh ha ka jingiakhun pyrshah ia kane ka khlam bad ka sorkar ka don kam ia ka jingiarap ban teh la kam ia kane ka khlam.
U Bah Charles u la kyntu ia ka ophis jong u Shongknor ba kan khate 50% ka tulop jong u bad ia kane ka pisa kaba khate dei ban aiti sha ka sorkar bad kane ka jingkhate kan long na ka bynta 12 bnai lynter 1st Iaiong 2020 haduh Lber 2021.
Ban pynkynmaw ba u MLA ka Nongthymmai ha kane ka dorbar mang tyngka kaba dang shudep u la kren hapoh ka iing dorbar bad u la ai jingmut ban khate ia ka tulop jong ki MLA 50%, na kaba la khate mynta kaba tang 10%.
