Shillong, Iaiong 02: U Mytnri Rangbah ka jylla u Conrad K Sangma mynta ka sngi u la plie paidbah ia ka skhim “Payment for Ecosystem Services” bad kane ka long ban iada ia ka shilynter ka tyllong um jong ka wah Ganol kaba don ha West Garo Hills District.
Kane ka skhim ka shong dor T.1.20 klur tyngka, u mytnri rangbah ha kane ka sngi u la sam ia ki cheques sha ki kynhun treilang lyngba ka skhim FOCUS, ha kane ka sngi la don lang u nongai buid ia u myntri rangbah ka jylla u Thomas A Sangma, u nongbat shabuk jong ka sorkar u Marcuise N Marak, u Principal Secretary ka sorkar jylla ba du CEO jong ka MBDA u Sampath Kumar, u Ram Singh DC jong ka West Garo Hills District.
Na ka liang jong ki Nokmas u President u Skylance G Momin bad ki nongialam shnong jong ki 20 tylli ki shnong kiba dei na ka Rongram Block kila ia don lang ha kane ka sngi, ia ka jingialang la pynlong ha ka shnong Asanang.
Haba plie ia kane ka skhim kaba thymmai u mytnri rangbah ka jylla u la ong ba mynta la iohi shisha ia ka jingpynjulor ia ki khlaw ki btap dei na kane daw ba bun na ki tyllong um ki tyrkhong noh bad kane ka wanrah ia ka jingkyrduh um ha ki khun bynriew .
U Myntri Rangbah ka jylla u la ong ba kane ka jingkylla ka suin bneng ka pynlong ruh ban hiar ha ka ioh ka kot, dei halor kane ka bynta ba ka sorkar ka hap ban pynmih ia ki skhim kum kane ka PES ban plie lat ha ka kamai kajih ia ki briew bad ban ia treilang bad ki paidbah ban pynneh pynsah ia ka mariang.
Ha kane ka jingialang u myntr rangbah u la pynpaw ba ka sorkar ka kwah ban don haduh 4200 kilomettr sawdong ki khlaw ban pynneh pynsah ia ki tyllong um ha ka jylla baroh kawei bad ka sorkar kan kyrshan ba ki briew pat kin ioh ban kamai ban kyntiew ia ka ioh ka kot.
Ha kane ka sngi u nongai buid jong u myntri rangbah ka jylla u Thomas A Sangma, u nongbat ia u shabuk jong ka sorkar u Marcuise N Marak ha ka jingkren ka jong kila Kyntu ia ki paidbah ban ia treilang bad ka sorkar ban iada ia ka mariang, ia ka jingkren pynshai halor ka skhim la kren da u CEO ka MBDA u Sampath Kumar bad u Dr. S Ashutosh u la kren pynkut ia ka jingialang paidbah, la don ruh kiwei ki nongkren ha kane ka sngi.
