Shillong, Nailar 09: Mynta ka sngi u Dr Mukul Sangma u la plie paidbah ia ka Mawkhar Multi Facility Utility Center (MMFUC) ka ban long ruh ka iing dorbar shnong jong ka shnong Mawkhar. Ia kane ka iing la tei ha ka jinglut kaba la kot sha ka T.1.68 klur tyngka ia kaba la bei pisa da ka sorkar jylla.
Haba kren ha kane ka jingialang kum u kongsan na ka liang jong u myntri rangbah ka jylla u la ong ba ka Mawkhar ka dei ka shnong kaba don hapdeng jong ka sor Shillong, ka jingdon jong kane ka iing kan iarap shibun ia ki samla ha kiba bun ki liang bad kum juh ia ki shnong ki thaw kiba don sawdong jong ka.
U myntri rangbah u la ong ba ki samla ki long kiba kiba kloi ban shah ialam bakla ha kiba bun jait ki jingsniew, u khot u wer ia baroh ban ia treilang ha ka ban ia khun pyrshah ia kine ki jingeh ban hikai ia ki khun samla ba kin long ki ba myntoi ha ka imlang sah lang. Kane ka jaka kan long kum ka pdeng hapdeng ka sorkar bad ki khun samla bad ha ka juh ka pork an long ka pdeng kum ka jaka ban tip ia ka khaii pateng.
U la ong ba ka jylla Meghalaya kala sei ia bun ki khana jingjop namar ba ki briew jong kane ka jylla ki long kiba shemphang kiba la lah ban wanrah ia bun ki jingkylla ha ka jylla bad ia kane dei ban pynneh pynsah na ka bynta ban kyntiew ha ka ioh ka kot. U khot u wer ia baroh ban ia treilang ban kyntiew ia ka jylla bad ban pynkhlain ia ka.
Ha kane ka sngi kiba la don lang ki long ka kong Roshan Warjri MLA jong kane ka jaka kaba dei ruh ka myntri ka koit ka khiah jong ka sorkar, u Bah R V Lyngdoh Myntri kam pyntoi sor, kiwei kiba la ia don lang ki long u Additional Chief Secretary, Urban Affairs, Dr Shreeranjan, Commissioner bad Secretary, Urban Affairs, u Bah F R Kharkongor and Director, Urban Affairs ia ka jingkren pdiang burom la kren da u rangbah shnong u Bah WHD Syngkon.
