Plie u MoS ka sorkar pdeng u Ramdas u la plie ia ka  Incubation Centre ha NEHU

Shillong, Nailar 28: U Myntri khynnah jong ka sorkar pdeng ba dei khmih ia ka tnad Social Justice & Empowerment, Ramdas Athawale mynta ka sngi u la plie ia ka ‘Incubation Centre’ ha North Eastern Hill University (NEHU), Shillong ha ka jingdonlang u Myntri ba dei khmih ia ka Art and Culture, sorkar Meghalaya Bah AL Hek bad Vice-Chancellor jong ka NEHU Prof SK Srivastava.

U Myntri jong ka sorkar pdeng u la iaroh ia ka jingitynnad ka jaka bad ka suinbneng kaba khuid bad pyngngad jong ka jylla Meghalaya, bad ong ba kum kine ki jingai sngewbha jong ka mariang dei ban bynrap da ka jingkyntiew ia ki karkhana, ki jaka pule bad ki jaka kyntiew ia ki sap ki phong (skill development centre) khnang ba ki samla jong ka thain kin lah ban iaryngkat kyrdan bad ka ri baroh kawei.

Kum kane ka ‘Incubation Centre’ kan long ka jingmyntoi ia ki briew ban kyntiew bad pynjanai ia la ki sap treikam jong ki bad kan iarap ban pynmih bad ai ki lad ioh kam ioh jam na ka bynta kiba bun ki briew, u la bynrap.

Ia ka jinglong jong ka Incubation Centre la ioh na ka jingsaindur jong u Myntri Rangbah duh ka Ri ia ka “ka jinglah pynmih hi ka ri ia ki tiar hapoh ka Make in India” ka ban plie lad ba ki start – up ba kin ioh ka jingialam lynti, ka jingai jingmut, ka jaka trei, ka jingbei tyngka bad ka jingiatrei lang ban kyntiew ia ki buit kiba tbit.

Shuh shuh, u Bah AL Hek, u la ong ba ka Incubation Centre kan iarap ban kynduh ia ki jingdonkam jong ki samla jong ka jylla bad ki thain ba marjan. U la ong ba kane ka don ka jingdonkam ban pyniasoh lang ia kito ki mar ia kiba don jingdawa bad kane ka Centre namar kane kan iarap ia ia ki briew.

Kane ka Incubation Centre kan iarap ia ki kam ba seng thymmai khnang ba kin sa lah ban ieng ha la ki kjat. Kane ka centre kan iarap ruh ha ka liang ka jingnang ba iadei bad ka teknoloji khnang ba kin ioh lad ban ioh pdiang ka ka jingbei tyngka na ki nongiarap shimet, ki kynhun ba iatreilang (partner) bad ki nongbei tyngka.

Hadien kane, u myntri u la pynlong jingialang bad ki heh ophisar jong ka sorkar Meghalaya. Haba iakren bad ki lad pathai khubor hadien ka jingialang, u myntri u la ong ba ka ministry jong u ka trei na ka bynta ban plie ki lad ki lynti bad ki jingdonkam na ka bynta ki briew kiba don jingduna ha ki dkhot met khnang ban lah ban wanrah ia ka jinglong jingman ka ban pynthikna kajuh ki lad ki lynti sha ki.

Kane kan pynthikna ka jingiada ia ki hok jong ki bad kan pynlah ia ki ban iashim bynta pura ha ka imlang sahlang, u la bynrap. Katto katne ki scheme kilong kum ki jingai jingiarap sha ki briew ba don jingduna ha ki dkhot met da kaba ai sha ki, ki jingiarap bad ki tiar ki tar ba donkam, bad ki bai bam tymmen jong ki.

U la pyntip sha ki nongthoh khubor ba ki don kumba 44000 ki divyang ne kiba don jingduna ha ki dkhot met ha Meghalaya ha kaba katkum ka khana samari (census) 2011 ka jingdon ki briew ba don jingduna ha ki dkhot met ha ka ri kalong 2.68 klur.

U Myntri u la ong ba 11000 ngut ki briew ba don jingduna ha ki dkhot met ki la ioh ia ka divyang pension kaba T. 500 man ka bnai ha ka jylla. U la pyntip shuh shuh ba ka ministry jong u, ha ka jingleh tyngeh na ka bynta ka bha ka miat jong ki briew kiba don jingduna ha ki dkhot met, ka la kyntiew ia ka bhah jong ki ha ka sorkar pdeng, sorkar jylla bad ki semi government service na ka bynta ki briew ba don jingduna ha ki dkhot met.

U la kdew ba ka Sugamya Bharat Abhiyan lane ka Accessible India Campaign ka thmu ban ai jingshakri sha ki briew ba don jingduna ha ka ri. U la pyntip sha ki lad pathai khubor ba ha kine ki san snem ba ladep kumba 4800 ngut ki briew kiba don jingduna ha ki dkhot met ki la ioh ki tiar jingiarap bapher bapher ha ki 5 tylli ki camp ba don ha kylleng ka jylla Meghalaya.

U myntri u la ong ba ki scheme jong ka sorkar India, kilong na ka bynta ka bha ka miat jong baroh ki briew jong ka ri ba kynthup ki ST, SC bad ki Divyang bad ki don 8000 kum kine ki camp ha kylleng ka ri.

U Athawale u la ong ruh ba ka Ministry jong u kan khmih halor ka jingtyrwa ban plie ia ka Sports Academy na ka bynta ki briew ba don jingduna ha ki dkhot met ha ka jylla kaba shongdor T. 350 klur. U la iathuh sha ki lad pathai khubor hadien ka jingialang bad u Bah Krymen Shylla ba ka sorkar Meghalaya ka la kyrpad na ka bynta ban shna ia ka Sports Academy ia ki briew ba don jingduna ha ki dkhot met, bad ka sorkar jylla ka la ai 50 acre ka jaka.

U myntri u la pynpaw ba manla ka sorkar kadei ban leh tyngeh na ka bynta ka jingkyntiew ia ka jingim jong ki briew ba don ha ki thain nongkyndong, ki ST, SC bad ki briew kiba don jingduna ha ki dkhot met, bad manla ka jylla kadei ban mih shakhmat da ki scheme ba don ia ki rukom ba thymmai na ka bynta ki briew ba don jingduna ha ki dkhot met.

 

What Next?

Recent Articles

Leave a Reply

Submit Comment

*