Mairang, Jylliew 3
0: U Dr Henry Lamin Pro Vice Chancellor jong ka skul bah North Eastern Hills University (NEHU) mynta ka sngi u la plie ia ka Kharsawphra College, ha ka Arts bad Commerce ha Mairang jong ka West Khasi Hills District.
Haba kren kum u kongsan ha kane ka sngi u Dr Lamin, u la ong ba nalor ki jingpule kaba kongsan ka long ba kumno ban ai jinghikai ia ki samla ha kaba ki lah ban ieng hala ki jong ki kjat ym da kila dep ia ki jingpule ka jong ki kane ka dei kaba ka sorkar pdeng mynta ka kwah ia kaba la tip kum ka skil development.
Ha kane ka sngi na ka liang jong u Dr Lamin u la ai ka jingiaroh ia u Bah Kitdor Syiem bam kwai ha dwar jong u blei u ba la long shisha u nongialam ba la iohi jngai ha kaba u la tei ia kane ka jaka ha ka rukom kaba lah ban pyndon kam ia ka ha ki ba bun ki liang ba ha kane ka juh ka jaka lah ban leh bun kiei kiei bad ia kane ka jingiohi jngai ka jong u la lah ban pynurlong mynta ka sngi.
Ban plie ia ka college kam dei kaba suk ia ka kynhun nongseng kin ia kynduh bun ki jingeh, kane ka college kaba la plie mynta ka sngi kala ioh ia ka jingbit na ka skul bah NEHU, u la ai ka jingkit bok ba kane ka skul bah kan kiew bad u la kyntu ba ki dei ban tur sha khmat ym ban kynran dien ban pyniaid ia ka college. Na ka liang jong u la ai ka jingkular ba un iarap katba lah na ka bynta kane ka college.
Ha ka jingkren jong ka kong Dr Streamlet Dkhar, kala ong ha kane ka jingialang paidbah ba ka NEHU kala ai jingbit ia ka Khatsawphra College ia kaba la plie da u Pro Vice Chancellor mynta ka sngi, ha ka juh ka por na ka liang jong ka University kala ai ia ka jingithuh kaba shipor na ka bynta lai snem bad ha pdeng kine ki lai snem ka college ka hap ban pynbiang ia ki jingdon kam baroh kiba ia dei bad ka NEHU bad kum juh bad jong ka UGC shuwa ban ai ia ka jingithuh kaba pura.
Na ka liang jong ka Kharsawphra College mynta ka sngi kala pynkup burom ia baroh kito kiba la ia don kti lang ha kane kaba pynlong ia kane ka college kumba ka long mynta. Kiba la ia don lang ha kane ka sngi ki long u MDC jong ka Mariang u Bah Equador Nongrang , u MDC jong ka Mawthadraishan u Bah Blanding Warjri, u Syiemjong ka Hima u Pa’im Prestar Syiemlieh.
U Bah Boldness L Nongum secretary jong ka college u la batai ia ka jingthmu jong ki, u Bah Lawanpynshngian War u la pyniaid ia ka jingialang bad ka kong Aida War Vice principal kala kren ai khublei.
