Shillong, Iaiong 14: Ban pyrshah ia ka jingtyrwa jong u myntri rangbah ka jylla u Conrad K Sangma ban ai Work Permit ia ki khar Bangladesh ban wan trei sha kane ka jylla Meghalaya, ka seng Congress mynta ka sngi kala pynlong ia ka jingiakhih da kaba ia pyrta ha phyllaw jong ka Congress Bhavan ha Thana Road Shillong.
Shuwa ba kin sdang ia ka jingiakhih, kila pynlong ia ka jingialang kaba lyngkot ha ophis jong ka seng Congress ha kaba kala don ka jingkren na ki lai ngut ki nongialam jong ka seng, kiba la kren ha kane ka sngi ki long u Zenith M Sangma MLA, ha kaba u la pynbna ba ka seng Congress dalei lei kan nym ailad ban treikam ka work permit ha kane ka jylla Meghalaya.
Halor kane ka jingtyrwa Work Permit kane ka sorkar MDA kaba la ialam da Conrad K Sangma, ka seng congress kala khot ia kane ka jingiakhih ban pyrshah, la ong ba na ka liang jong u myntri rangbah ka jylla u al dep ban ia phylliew jingmud bad ki myntri jong ka sorkart pdeng kum ka Shuhsma Swaraj, u Kiren Rijiju.
Shuwa ba kan urlong na ka liang jong ka seng Congress ka la khot ia kane ka jingiakhih bad kane ka long tang ka jingsdang jong ka jingiakhih, la bethah ia baroh ki nongialam jong ka seng ba kum kane ka jingiakhih dei ban pynlong ha ki District bad haduh ki Block, la ong u Zenith.
Kiwei kiba la kren ki long u president jong ka MPCC u Dr C Lyngdoh, u Bah John F Kharshiing. Kiwei kiba la ia don lang ha kane ka sngi ki long u Dr Azad Zaman, u bah PT Sawkmie, Bah HM Shangpliang, Bah George B Lyngdoh,ka Dikanchi D Shira baroh ki MLA, kong Wansuk Syiem MP Rajya Sabha, u Dr DD Lapang bad bun kiwei dei ki nongialam jong ka party.
