Shillong, Naitung 17: U Shongknor ka iing dorbar thawain ka jylla u bah Metbah Lyngdoh ba dei ruh MLA jong kane ka jaka ha kane ka lyngkhuh sngi iap ba 185 snem jong u Syiem ka Hima Nongkhlaw u Tirot Sing Syiem u la pynbna mynta ka sngi bay n buh noh ia ka dur mot ba shirynieng u Syiem Tirot Sing Syiem ha Mairang.
Haba kren ha kane ka sngi kum u kongsan ha ka jingialang ban rakhe ia kane ka lyngkhuh sngi iap ban 185 jong u Syiem ka Hima Nongkhlaw u Tirot Sing Syiem u la ong ba da kam dei ban don kane ka khlam COVID-19 la dei ban dep ia kane ka jingthmu hynrei kane ka jingjia kala pynhut.
La iathuh ha kane ka jingialang ba ka kam kala iaid sha khmat bad hapoh kine ki khyndait bnai yn sa lah ban pynurlong ia kane ka jingthmu bad ia kane ka dur kaba shirynieng jong u khlaw ka wait jong ka jylla yn buh ha Mot Tirot ha Mairang ha ka jaka ba don u mot ba mynta.
Ha kane ka sngi na ka liang jong u Shongknor u la kren ruh ha kaba ia dei bad kane ka Khlam COVID-19, u la ong ban ia leh pyrshah ia kane kam dei tang ka sorkar hynrei don kam ia ka jingiatrei lang da baroh ki paidbah nongshong shnong da kaba don ka jingkitkhlieh da lade ia lade.
U la ong ba ka sorkar kala pynmih ia ki jingbthah na ka por sha ka por bad kum ba ka long mynta baroh ki briew ki tieng ia kane ka jingpang bad ka jingtieng ka long bay m pat don dawai. U la ong ba ki Ri jong ka pyrthei kum ka Russia, England, Israel bad ka India ruh kala ialeh ban pynioh ia ka dawai ban ia khun pyrshah ia kane ka jingpang.
Kaba kongsan eh ka long ba to kum ki paidbah ban ia sumar da lade ia lade, u shongknor u la pynpaw ia ka jingsngewnguh ia ki khlieh nongsynshar ba kila ia treilang ryngkat ryngkat bad ka sorkar ha kane ka jingialeh ban teh lakam ia kane ka khlam. U la ong ba ka sorkar kala shim ia baroh ki lat ki lynti ban ialeh pyrshah iakane.
Ha ka jingkren jong u CEM jong ka KHADC u bah Titosstarwell Chyne u la ong ba ka jinghikai kaba kum ki long dien ki ioh ka long ba dei ban bud ia ki nuksa jong u ka long bay m dei ban shaniah ha kiwei bad ba ymd ei ban ailad ba ia ka hok yn sah knieh noh ha kiwei pat.
U la ong ba kam myntoi ban rakhe ia kane ka sngi lada ngim but ia ki dien jat jong u bad ban bun ia ki dien jat jong u ka long ba lada don ha kano kano ka bynta kaba trei to ban pyndep hok ia ka kamram kaba la pynkhamti.
Kiwei ki nongkren ha kane ka sngi ki long u EM ba dei peit ia ki kam Elaka jong ka KHADC u Bah Jambor War, u Syem jong ka Hima Mylliem u Pa.im Ainam Syiem, u Syiem Khynnah jong ka Hima Khyriem u Syiem Habapan Sing Syiem, u Bah Ernest Mawri President jong ka BJP Meghalaya State Unit u MDC jong ka Mariang u bah Batskhem Ryntathiang.
Kiba la ia don lang na ki seng bhalang u Bah KS Rani, Vice President ka HNYF, ki nongialam ka KSU, FKJGP, na ka Kur Syiemlieh bad kiwei kwei, Ia ka jingialang la pyniaid da u Syiem jong ka hima u Pa,im Phres M Syiem bad ia ka jingkren ai khublei la ai da u Syiem Khynnah u Bah K M Syiem ha kane ka sngi baroh ki mynta ka hima kila ia don lang.
