Shillong, Iaiong 23: U Chief secretary jong ka jylla Meghalaya u M S Rao halor ka jingbthah jong ka tnad kam poh iing ka sorkar pdeng mynta ka sngi u la pynmih ia ka jingpynbna ha kaba ia dei bad ki kam kiba la shah ban trei ha ka jylla naduh la shai ka sngi, laitnoh hapoh ka nongbah Shillong bad ki khap jong ka bad kiba hap hapoh jong ka Mylliem Block jong ka East Khasi Hills District.
Kane ka jingbthah kaba la pynmih da u Chief Secretary jong ka jylla Mynta ka sngi kala ong ba baroh ki Deputy Commissioner ki hap ban dang pynbeit ia ka por plie bad pork hang ha kaba ia dei bad ki kam ki jam. Dei ban pynthikna ba baroh ki kyndon ha kaba ia dei bad ka jingiapynjngai kan long katkum ka kyndon kaba 3(i) kaba la bthah da ka tnad kam poh iing jong ka sorkar pdeng.
Baroh ki Deputy Comminssioner, laitnoh ka Deputy Commissioner jong ka East Khasi Hills kalah ban dang bsuh shuh shuh ia ki kyndon da kaba pynmih ia ka hukum da kaba pyntip sha ka political department katkum ka jingbthah ka tnad kam poh iing jong ka sorkar pdeng. Ka DC jong ka East Khasi Hills ka lah ban bsuh shuh ia ki kyndon hynrei kaba hap ban ioh ia ka jingmyntjur na ka political department.
Baroh ki DC ki dei ban but ryntih ia ka jingbthah jong ka tnad kam poh iing jong ka sorkar pdend katkum ka para 4 kaba la pynmih ha ka 15/04/2020 bad kita ki long, ba baroh ki jylla bad ki Union Territory kin dei ban pynkhein ia ki kyndon jong ka Disaster Management Act, 2005 ha kaba ki hap ban pyntreikam ryntih ia ka. La shah ia ki jylla bad ki Union Territory ba kin buh shuh shuh ia ki kyndon kiba kham pyrkhing katkum ka jinglong ka jaka.
Ki kam ki jam jong ki paidbah kiba ki juh trei da ki briew shimet la shah ia ki ba kin trei ia kiba la kdew ha kane ka jingbthah bad kita ki long kine, ki dukan kiba ia dei bad ki marbam kiba la ithuh da ka tnad political department kumba la dep ban pynmih hukum, Currier services kiba ia dei bad ki mar ba don kam, ka khaii pateng lyngba ka E-Commerce ba ia dei bad ki mar ba don kam. Ki kam ba ia dei bad ka Common Service Centre.
Ki kam kaba ki trei ki ai jingshakri kaba ki trei la jong ki long kum ki, electrician, IT repairs, Plumbers, Kiba shna kali, ki mistri, ki karkhna shna kali ia ki truk ha ki surok bah, ki dukan dietiar rong bad kiba die tin sop iing, dewbilat kiba pyndon kam ha kaba shna jingshna kyntup ia ka kit ruh. Ki dukan die tiar light.
Haba ia dei bad ki karkhana la ki dei ki jong ka sorkar ne jong ki riew shimet kiba la lah ban plie ia mynta ki long, ki karkhna pynmih marbam tang kim dei ban long shabar jong ka ki municipal bad municipal corporations kine kyntup ia ki karkhna tyllait khaw bad karkhna pynmih umphniang bam. Ha ki nongkyndong ki karkhan sha Mawiit kine ruh ki dei ban long sha bar jong ki municipal bad Municipals Corporations.
Haba ia dei bad ki kamrep kyntup ruh ia ka kam ri jingri kum ka kam ri syiar, ri dohkha, jaka pynkha kharit, ka jinglum ia ka dud, ka jingpynih ia ki jingshna na ka dud, ka jingshallan ia ka dud ka jingthied bad die ia ki marrep, ki jaka buh, ki jaka shna, ki jaka song bad ka jingshallan ia ki, kum ki symbai, ki jingbam ban ai ia ki jingri, kynthup ia ka leit ka wan kiba kit ia ki marrep.
Ki kper shala ki lah ban sdang tang hynrei ki nongtrei ki dei ban long tang 50%, kyntup ia ki nongkheit, ki nongshna bad ia ki nongleit die. Ka jingkit iaki marrep kan long katkum ki lynti kiba la bthah da ki Deputy Commissioner katkum ka jingdon ka jingpang COVID-19. Ki Hospital,ki Dispensary, ki jaka ai dawai, ka jingdie ia ki dawai ha kaba ia dei bad ki jingri.
La shah ban pyntrei ia ki jingtrei kiba dei na ka MNREGA hynrei hap ban but ia ki kyndon jingpyniajngai bad ki kam kiba ha khmat eh ba dei ban pyntrei ki long ki bun um bad ki nur ring um sha ki jaka rep. Ia ki jingtei, kum ka jingshna surok, jingshna ban ring um sha ki jaka rep, baroh ki jingtei ha ki karkhna, kyntup ia ki MSMEs ha ki nongkyndong tang ba ki dei ban long sha bar jong ki municipal bad ki Municipal Corporations. La shah ban tih mawria bad ban kit.
Kitei ki long kiba kam kiba la lah ban trei naduh la shai ka sngi ha ryngkat ka jingbut ryntih ia ki kyndon, kane ka long katkum ka hukum kaba la pynmih da u Chief Secretary jong ka jylla mynta ka sngi.
