Shillong, Naiwieng 13: Ka lympung ia mir jingmut kaba lai sngi halor ka Teaching Techniques in Physiology la pynlong ha NEIGRIHMS, Shillong naduh ka 10 tarik haduh ka 12 tarik u Naiweng, 2018. Kine ki lympung ia mir jingmut ki dei ba la sdang da kaInternational Union of Physiological Sciences.
Ka mat pdeng jong kine ki lympung ia mir jingmut ka la long, “Ban pynsuk ia ka jinghikai kylliang shaphang ki lad ki lynti kiba bha tam ha ka jinghikai ia ka Physiology.” Ki nonghikai ha kane ka lympung ki long ki riewshemphang kiba la bna nam ha ka pyrthei kum ka Professor Liisa Peltonen na ka University of Helsinki, Finland, Professor Susan Barman na ka Michigan State University, Professor Jayasree Sengupta and Professor D. Ghosh na AIIMS, New Delhi.
U Prof. (Dr.) D. M. Thappa u la plie ia kane ka lympung ha ka 10 tarik u Naiwieng 2018 ha ka Auditorium jong kane ka jaka pule. U la ai jingkren halor ka jingdonkam ka por ban don kum kine ki lympung ia mir jingmut ha ka Ri bad ban lamkhmat ha ki jinghikai bathymmai kum ka Problem based teaching, Case based teaching bad Flip Classroom teaching.
Ka Prof. Jayasree Sengupta, Chairperson, IUPS, ha ka jingkren jong ka la batai bniah halor ka thong jong ka IUPS. Ka la ong, Ka IUPS ka dei ka seng kaba long kum ka shatri kaba kdup lang ia ki seng jong ki Physiological Science. Ka IUPS ka la don ka jingialang ha Brazil ha u snem 2017 ha kaba la mih hynniew tylli ki jingai jingmut kumno ban pynthymmai ia ki Physiological Science bad ka la don ka jingpynsngew ba donkam ban pynshai ia ki briew shaphang ka thong.
Ka NEIGRIHMS, Shillong ka dei kawei na ki lai tylli ki jaka ha ka Ri ha kaba kum kane ka jait lympung la pynlong da ka IUPS. U Prof. D. Ghosh u la ong ba ka IUPS ka sngewnguh ia baroh lai tylli ki jaka khamtam ia u Director ka NEIGRIHMS, Prof. (Dr.) D. M. Thappa uba la ai mynsiem naduh ba sdang.
Ka jingthmu ba kongsan jong kane ka lympung ka long ban don ka jingiakren bad jingiatainia halor ki jinghikai katkum ka por mynta bad ki rukom hikai kiba lah ban pyndonkam ha ka Physiological Science. Ki nongshim bynta ha ka jingshisha ki dei hi ma ki ki nonghikai hynrei ki kwah ban tip shuh shuh shaphang ki rukom hikai bathymmai, ki tiar bad rukom pyniaid ha ka kam hikai.
Ka la don ka interactive bad Hands-on session halor ka Adaptive Physiology Education Techniques na ka bynta ki nonghikai rangbah jong ka Physiology. Ha ka sngi pynkut ha ka 12 tarik u Naiwieng 2018, la sam ruh ia ki syrnod sha ki nongiashim bynta.
