Shillong, March 21: Ka World Vision India, East Khasi Hills District ha ryngkat ka jing ia treilang bad ka Dorbar Shnong Laitkyrhong, Laitkyrhong Sports Club lem bad kiwei de ki Seng Trei mon sngewbha jong ka Thain Mawkynrew kala pynlong ia ka Awareness Programme halor ka phang pdeng “Ban rat dyngkhong ia ki kam sniew ”. Ka jingthmu ba kongsan jong katei ka Awareness Programme ka long kum shi bynta ban kyrsiewthiah ia ki paidbah Nong Shong Shnong ban kiar, ban phikir bad ban iada na ki jing wan lyngshop jong kiba bun ki jing sniew kiba pyn sniew dur ia ka imlang ka sahlang.
Ha katei ka Awareness Programme la wan ban iashim bynta da kiba bun ki khynnah kiba dang khie dang san, Ki khun samla kynthei bad Shynrang, ki long kmie long kpa bad ki Riew rangbah, ki nongialam jong ka Dorbar Shnong, Nongkitkam bad Nongialam Laitkyrhong Sports Club, Childrens Club, SHG bad kiwei kiwei dei ki Khynhun Trei mon Sngewbha. Ha kane ka sngi kala don ruh ka jingialehkai kynjat ball.
Ka jinghikai kaba la hikai ha kane ka sngi hi ka long ban khanglad ia ka jingioh lok khynnah, kiar na ka jingdih duma, kiar na ka jingdih kyiad, wat pep skul bad ban iada ia ka mariang. Ha kane ka sngi nalor ka Awareness Programme bad ki Jing pyn byrngia kiba laiphew jait na ka Liang jong ka Ka World Vision India, East Khasi Hills District, ka Dorbar Shnong Laitkyrhong, Laitkyrhong Sports Club lem bad kiwei de ki Seng Trei mon sngewbha jong ka Thain Mawkynrew ki la pynkup burom bad ai khublei Khatduh ia u Bah Khrawborlang Wahlang, Community Development Facilitator jong ka Word Vision India uba ju khmih ia ka Mawkynrew Block mynta la palat 8 snem kynthih hynrei uba la ioh Transfer noh pat mynta sha Kolkatta, West Bengal.
La pynphuh pynphieng bad ai mynsiem shuh shuh ia ki Nong iashim bynta bad kumjuh ruh ia ki paidbah Nong Shong Shnong da ka jing ia don ryngkat jong u Bah Banteidor Lyngdoh, MDC Mawkynrew Constituency uba la long kum u Kongsan ha katei ka sngi. Haba kren kum u Kongsan ha katei ka sngi na ka liang jong u Bah Banteidor Lyngdoh, u la ai jingiaroh shikatdei eh ia kane ka sienjam ba la shim da ka World Vision India, East Khasi Hills District ha ryngkat ka jing iatreilang bad ka Dorbar Shnong Laitkyrhong ban pynlong ia kum kine ki jingaijinghikai.
Shuh shuh U Bah Banteidor u la ong ruh ba ba dei lyngba jong kine ki Awareness programme yn lah shisha ban rat diengkhong ia kiba bunjait ki jing sniew lyngba ka jingia treilang ha ki liang baroh. Na ka liang jong u Kongsan u la ai khublei kyrpang ruh ia u Bah Khrawborlang Wahlang, Community Development Facilitator jong ka Word Vision India uba la ai ka jingshakri mynta la palat 8 snem kynthih ia ka Mawkynrew Block bad u la ong ruh ba u Snniang uba une u Riew Rangbah u la noh sha ka Imlang ka Sahlang kum ki Piadbah Nong Shong Shnong ngim dei ban klet da lei lei ruh.
