Shillong, Jylliew 08
: Ki dkhot jongka KSU hynne ka sngi ki la ioh ban bat iaki ar ngut ki bar jylla uwei na West Bengal bad uwei pat na Assam kiba la wan daka kali ML 05H 8575 katba ki dang thmu ban rung hapoh South West Khasi Hills District.
Kane ka jingpeitngor jong ka seng ka long hadien ba ki la ioh jingtip shaphang ka rung ka mih laitluid jong ki bar jylla khamtam hadien ba ki bor sorkar kim shym la shimkhia halor ka rung ka mih ki briew nabar jylla .
Ha kane ka jingkhynra jong ka seng ki la lap ba kim don ki kot ki sla kiba biang bad kaba pynlyngngoh ka long nangno pat ki ioh jingbit ban pyrshang ban rung hapoh South West Khasi Hills District ha kum kane ka por.
Ka seng ka maham ruh iaki bor sorkar bad ki bor District jongka South West Khasi Hills District bad East Khasi Hills District ba ka seng kan nym pdiang iano iano ki ba nabar jylla ban wan buh jingma iaki paitbah ka Mawsynram Block bad South West Khasi Hills District.
Ka seng ka kynthoh jur iaka sorkar bad ki bor District da kaba buh jingkylli ruh ba ” Hato u corona virus u treikam tang iaki trai shnong”. Kum ki paitbah ka District ki la iatreilang bad ki bor sorkar bad ki sngewthuh ba ki jingteh pyrkhing ia ka leit ka wan ka long kaba don kam hynrei kam dei pat ban long shiliang namar une u khniang jingpang um map lada ki dei ki trai shnong ne bar jylla.
Ka KSU ka la kynthoh jur ruh ba lada jia mih positive case ha South West Khasi Hills District bad ki bynta ka Mawsynram Block tang na bynta ka daw ba AI laitluid iaka rung ka mih ki bar jylla , ki bor sorkar bad ki bor District ki dei ban shim jingkitkhlieh halor ka jinglehsting bad ka jingai jingbit iaki ban rung hapoh ka dong ka thain khamtam ha kaba kum kane ka por.
Ka KSU South West Khasi Hills District ka la bthah ia baroh ki units bad circle ban pynjur iaka jingpeitngor bad ka jingkhynra bar jylla nangne shakhmat khnang ban iada iaka dong ka thain na ka jingma. Haba ki bor sorkar bad ki bor District jongka South West Khasi Hills District bad East Khasi Hills District Kim shym la lah ban ai jingshngain pura iaka Dong ka thain.
Na ka liang jong ka KSU ka kam ba mynta ka la dei ka kynti jongka seng ba ngin leh hi noh. Ngi kyntu ruh iaki bor shnong ban ai jingiatreilang lem bad ka seng ban weng ia kane ka jingma jongka thain Mawsynram bad jong ka South West Khasi Hills District. Kane ka dei ka kyrwoh na u samla Jiedskhem Nongsiej, General Secretary, KSU South West Khasi Hills District.
