Shillong, Lber 05: Kum shi bynta ban bud beit bud ryntih ia ki kyndon treikam jong ka Sarva Shiksha Abhiyan 
(SSA) bad ka hukum bala pynmih da u State Project Director (SPD) SSA-SEMAM Ambrose Ch.Marak ha ka 16 tarik Nohprah, 2016, u bah W. Biam District Mission Coordinator (DMC) SSA-SEMAM Mawkyrwat u la pynmih ia ka hukum ban pyntreikam pura ia rukom siew ia ka tulop sha ka bank jong ki hi, halor ka tulop ki nonghikai SSA hapoh u pud u sam ka South West Khasi Hills District.
U bah Lastborn H.Pariong President ka Meghalaya SSA School Association (MSSASA) South West Khasi Hills Unit, ha ka kyrwoh khubor u iathuh ba u DMC ka Mawkyrwat ha ka shithi ba la phah sha ka Synjuk ha ka 15 tarik u Rymphang mynta u snem hadien ka jingiakynduh bad ki dkhot ka MSSASA mynha ka 23 tarik Kyllalyngkot mynta u snem , u la pyntip ba ka Ophis jong u DMC SSA-SEMAM South West Khasi Hills , Mawkyrwat ka la pynmih ia ka hukum bad bthah ia baroh ki managing committee jong ki skul SSA hapoh South West Khasi Hills District kiba kynthup ia ka Ranikor bad Mawkyrwat Block ban sangeh noh shisyndon ia rukom siew ia ka tulop jong ki nonghikai SSA kaba ki la leh baroh shikatta da kaba siew da ka pisa.
La bethah ban phah beit ia ka tulop ki nonghikai sha ka bank account jong ki da ka E- transfers mar ia ioh ia ka fund na ka ophis DMC lane BMC. U DMC Mawkyrwat u la phah jingthoh ruh sha baroh ki branch manager jong ki bank kiba don hapoh ka district ba kin leh bad pynbiang ia ki jing donkam ban pyntreikam ia katei ka hukum haneng, bynrap shuh shuh u bah L.H.Pariong.
Kumban shu pynkynmaw, naduh u snem 2013 ka Meghalaya SSA School Association (MSSASA) sengkmie kala dawa na u State Project Director (SPD) ban pyntreikam pura ia ki kyndon kiba don hapoh ka SSA ha kaba iadei bad ka jingsiew ia ka tulop ki nonghikai SSA kaba ong ba ka tulop ki nonghikai SSA dei ban phah beit sha ki personal account ki nonghikai da ki managing committee mar iaioh ia ka pisa na ka ophis DMC lane BMC bad da ka jingiaibuddien jong ka Synjuk la sdang ban pyntreikam ia katei ka kyndon ha u snem 2016 bad la nang pyntreikam mynta shait shait ha baroh ki District hapoh ka jylla, ong u bah Pariong.
U bah Pariong u pynpaw ruh ia ka jongkmen ba ki nongkitkam ka All Meghalaya SSA Schools Teachers Association kawei pat ka synjuk ki nonghikai SSA kiba pyrshah baroh shikatta ban pyntreikam ia kitei ki kyndon ka SSA namar ka jingbymtip jong ki ia ki norms jong ka SSA , hynrei mynta ki la pdiang sngewbha bad ai jingkyrshan ia ka MSSASA halor kitei ki jongdawa kiba iarap bad pynmyntoi shibun ia ki nonghikai SSA hapoh ka district bad ka jylla hi baroh kawei.
Ka synjuk ka ai khublei ruh ia u DMC ka South West Khasi Hills District ba dei da ka jingshimkhia bad jingtreihok jong u la lah ban pynurlong ia ka jingdawa jong ka synjuk bad ngi kitbok kit ryiang ba utei u ophiser un nang trei bad leh shibun ki kam ban pyniaid beit iaid ryntih ia ka SSA hapoh ka district, la ong u Bah Lastborn H. Pariong
President MSSASA – South West Khasi Hills District Unit.
