Shillong, Naiwieng 16: Ka High Power Committee (HPC) kala shong mynta ka sngi ha kaba kala shim ia ka rai ban pyndam noh ia ki tender kiba la dep ban khot ban tei ia ka iing dorbar thawain jong ka jylla na ka daw ba kawei na ki kompeni kaba thep ia ka tender kala thep duna sha ba palat ha kaba ka HPC ka sngew ba kane ka company kan nym lah ban pyndep ia ka kam.
Haba kren ha ki nongthoh khubor ha dien ba la dep shong ka HPC, na ka liang jong u shongknor u la ïathuh ba ki kompeni kiba la thep ïa ki tender katkum ka jingkhot tender ka tnat PWD kidei ka kompeni Simplex Infrastructure Pvt ltd, ha kaba kala thep tam 21% na ka dor ba la buh, ka kompeni Gautam construction Pvt ltd ha kaba kala thep duna na ka dorkar kaba la buh da 15.01% bad ka Shapoorji Pallonji Co & ltd kala thep tam da 29.92% na ka dor ba la buh. Ka dor jong ka tender kalong T.105.84 klur.
Haba ka HPC kala shong mynta ka sngi, kala ia kren bniah ia kane ka kam bad ha dien ba la ia kren sani kala shim ia ka rai ban pyndam noh shuwa ia kine ki lai tylli ki tneder bad la bethah ia ka PWD ba kan khot noh da kawei. Ka jingpyndam ka long halor ka nongrim ba kumno ar tylli ki kompeni ki thep palat ia ka dor kaba la buh bad kawei pat kala thep duna na ka dor kaba la buh.
Na ka liang jong ka HPC ka seng ba lada ai sha kane ka kompeny kaba thep duna kan nym lah ban trei ia ka kam bad kin mih bun ki kynrum kynram ha dien ha bud bad la sngewthuh shai ba kan nym lah ban pyndep ia ka jingtrei da ka dor kaba kala pan namar ka la don lypa ka jingduna palat ia ka T.15 klut tyngka.
Ha kane ka jingialang jong ka HPC la don u myntri rangbah ka jylla u Dr Mukul Sangma, u myntri ka tnad shna surok u Martim M Danggo, ka kong Ampareen Lyngdoh myntri kam shna iing u Bah RV Lyngdoh myntri kam pynroi sor bad u Bah Phlastingwell Pangniang MLA bad ki heh sorkar na ki tnad bappher bapher.
