Shillong, Iaiong 06: Ka Kabinet mynta ka sngi kala shim ia ka rai ban siew T.700/- tyngka shitaiew ia kito ki nongshongdukan ba rit baria bad kiba im na ka bylla sngi kiba khlem pat register bad ka sorkar kiba la shah ktah ha kane ka jingkhang ban ia leh pyrshah ia u COVID-19.
Ia kane ka jingiarap yn ai na ka “Chief Minister’s Relief Against Wage Loss scheme” ia ka pisa yn phah sha ki bank akount jong kito kiba dei ban ioh ia ka jingmyntoi ka jingshim kyrteng ia kine kan kut ha ka 8 tarik mynta u bnai. Ha dien bala ioh ia ka jingkhein yn sa tip katno ka pisa ka don kam, la ong ba ka pisa kala dep don, la ong u Symbut myntri rangbah u Bah Prestone Tynsong.
La pynshai shuh shuh ba kito kiba la dep register bad tnad labour hapoh jong ka “Building and Other Construction Workers” kiba la register hapoh ka MGNREGA, ki Muster Roll ha ki tnad sorkar, kiba trei bylla sngi bad kiba trei sngi ha ki ophis sorkar bad ki nongrep kiba la don hapoh ka jong ka ‘PM-KISAN’ kin nym ioh ia kane ka jingmyntoi.
U Symbut myntri rangbah u la iathuh ba haduh mynta ki samla pule bad kiba trei shabar ka jylla kiba dang sah kut sha bar ka jylla ha ki bynta bapher bapher jong ka Ri kiba khlem pat ioh ban wan phai iing ki don 2192 ngut kiba la pynpaw ba ki kwah ban wan phai noh sha iing.
Haba ia dei bad kane ka sorkar ka da kyrpang eh ia ki bad ia kiba ha iing ha sem ba ki dei ban sah shuwah sha kito ki jaka kaba ki don na ka bynta ka jingbha jong ki bad kum juh na ka bynta ka jingbha jong ka jylla. La kyrpad ia ki baroh ba kin sah shuwa haduh ka 30 tarik mynta u bnai.
