Rai ka kabinet ban thung ia ka kynhun tohkit ba laitluid ba shah bom ka kong Agnes-Amita

Shillong, Naiwieng 26: U myntri kam poh iing ka jylla u James K Sangma u la iathuh ba ka kabinet kaba la shong mynta ka sngi kala shim ia ka rai ban thung ia ka kynhun tohkit kaba laitluid, ban tohkit halor ka jingshah bom ka kong Agnes Kharshiing bad ka Amita Sangma.

Haba kren ha ki nongthoh khubor u la iathuh ba ka sorkar ka sngewkhia haduh katta katta ia kane ka jingjia, dei na kane ka daw ba ka kabinet kaba la long mynta ka sngi kala shim ia ka rai ban thung ia ka kynhun tohkit kaba laitluid ban tohkit halor ka jingjia bad ka jingthohkit kan long naduh kaba sdang ba la khang dewiong ha u snem 2014.

Na ka liang jong u mytnri kam poh iing u la ong ba ia ki kyndon ban tohkti ha kaba ia dei bad kane ka kam ka political department kan sa leh ia kaba don, hynrei u la ong ba u ban tohkit ia kane ka kam un dei u nongbishar ba la shong thait, namar ka sorkar ka da sngewkhia palat ia kane ka jingjia.

Haba ia dei bad ka jinglut jingsep baroh na ka bynta ban sumar ia ka kong Agnes bad ia ka Amita ka sorkar ka la dep ban shim ia ka rai ba kan bei na ka sorkar. Haba ia dei bad kane ka jingshah bom jong kine ki ar ngut ka ain kan leh ia kaba don kam kat kiba don kit kin ngap ha ka kti jong ka ain.

Haba ia dei bad ka jingkylli halor ka jingkynnoh ba don kti u nongialam jong ka seng NPP na ka liang jong u myntri kam poh iing u la ong ba, ka ain kan leh ia kaba don kam, la u dei na kano kano ka party baroh ki nongleh ia ka kam sniew kin hap ban shah pynshitom ha ka ain.

Haba ia dei bad ka party, na ka liang jong u James u la ong ba ia kane yn nym lah ban ong marwei la ka seng kan pynshitom ne em, hynrei hap ban pynshisha, hato kata ka jingkynnoh ka long kaba dei ne em ym lah ban shu sngap ia ki jingkynnoh.

What Next?

Recent Articles

Leave a Reply

Submit Comment

*