Shillong, Iaiong 11: U Lamphang jong ka iing dorbar thawain ka jylla u bah Metbah Lyngdoh u la pyntip ba ha dien ka jingialang kaba la long ha pdeng u symbut myntri rangbah ka jylla u bah Prestone Tynsong bad u nongialam ka liang pyrshah u Dr Mukul Sangma kila shim ia ka rai ba baroh ki MLA kin noh syniang 10% sha ka Chief Minister Relief Found naduh 01st Iaiong 2020 haduh 31st Lber 2021, katba mut shisnem lynter.
Ia kane ka jingialang la khot da u Lamphang ka iing dorbar u Bah Metbah Lyngdoh mynta ka sngi ha kaba la ia don lang u symbut myntri rangbah ka jylla u Bah Prestone Tynsong bad u nongialam ka liang pyrshah u Dr Mukul Sangma, u myntri rangbah ka jylla ym shym la lah ban poi namar ka don ka Video Conferencing bad u myntri rangbah duh jong ka Ri India. Ha kane ka jingialang ba ki MLA baroh 60 ngut kin noh syniang 10% ka tulop jong ki ha kane shisnem sha ka CMRF.
U Lamphang u la iathuh ba ia kane ka rai la shim da ka jingiamynjur lang jong baroh ki seng sain pyrthei. U Lamphang u la pynpaw ia ka jingsngewkmen ba baroh ki MLA da ka mon sngewbha kila shim ia kane ka rai ban ia noh syniang ban ia leh pyrshah ia kane ka khlam COVID-19.
Ha kane ka jingialang ia kren ba kumno ban shim ia ki lat ki lynti baroh ban pynthikna ba kane ka khlam COVID kam dei ban ioh rung sha kane ka jylla, u Lamphang u la ong ba ka sorkar kala shim ia baroh ki lat ki lynti ban iada ba kane ka khlam kam dei ban ioh rung ha jylla.
U Bah Metbah Lamphang ka iing dorbar u khot u wer ia baroh ki paidbah nongshong shnong ka jylla ban ia trei lang bad ka sorkar namar ka jingjop kan long ka jingiatreilang ki paidbah u da kyrpad jur ia ki paidbah ban ia but ia ki jingbthah kaba ka sorkar kala pynmih na ka por sha ka por.
