Jowai, Nohprah, 30: Ka AJYWO Central Body ha ryngkat ka AJYWO East Jaintia Zone hapoh ka jingialam u Bah M H Dkhar President bad u Bah Heatermoon Ryngkhlem, President mynta ka sngi 30 tarik u Noprah ia kaba la tip kum ka Kiang Nangbah Day, kum ba ju leh man la ka snem, ka seng ka la leh burom bad kynmaw ieit ia u Kiang Nangbah, u Khlawait Bakhraw jong ka Ri Jaiñtia, u Nongialeh Laitluid ba satar bha, ia u ba la pyniap da kaba shu sdien phasi paidbah da ka sorkar phareng ha ka 30 tarik u Noprah, 1862 ha Jowai, da kaba leit buh syntiew ha u Mot Dur jong u (Kiang Nangbah), ha Khliehriat, East Jaintia Hills District mynta ka sngi.
Ha ka kane ka jingkynmaw ieit bad leh burom jong ka AJYWO ia u Kiang Nangbah ha ken ka lyngkhu sngi iap ba 156 snem jong u, la iadon lang ruh u Bah Adelbert Nongrum, MLA jong ka North Shillong Constituency bad ki nongbud jong u lem bad ki dkhot jong ka AJYWO.
Ha kane ka jingkynmaw burom ia utei u Khlawait ba khraw jong ka Ri Jaiñtia, la ai jingkren lyngkot da u Bah M H Dkhar, President jong ka AJYWO Central Body, u Bah Adelbert Nongrum, MLA lem bad kiwei kiwei de bad lad pynlong ruh ia ka jingiasngap jar kaba shi minit ha khmat jong u tei u Mot Dur jong u Kiang Nangbah bad la pynwai ia katei ka jingialang kaba rit bad da kaba ia buh syntiew lang ha u Mot Dur jong u Kiang Nangbah, da ka AJYWO Central Body, AJYWO East Jaintia Zone bad u Bah Adelbert Nongrum, lem bad ki nongbud jong u.