Shillong, Lber 31: U bah Adrian C Mylliem President jong ka Meghalaya Pradesh Youth Congress la ong ba kane ka jingiakhih ka party Congress Pyrshah ia kane ka jingkiew dor ki mar ki matta kan long tang ka jingsdang kin dang iai pynjur shuh ban pynbor ia ka sorkar ba ka dei ban leh ei ei halor kane ka jingkiew dor.
Haba kren ha ki lat pathai khubor ha Congress Bhavan mynta ka sngi la ong ba ka jingkiew dor kaba man ka por ka Diesel bad ka Petrol ka ktah ia ki duk ki rangli bad ka jingkiew dor ka umphniang ka ktah lut baroh ki mar ki mata, la ong kum ka Umphniang bam mynta kala kiew dor sha ba palat.
Ia kum kane ka jingiakhih ban pyrshah ia ki mar ki matta kan long biang la sngi saitjain bad la khot la wer ia baroh ban ia snoh kti lang ha kane ka jingiakhih ka ban long ha ka por shibaje shiteng sngi, ka Kyntu ia ki paidbah ban ia mih sha khmat.
Ka jingeh kaba long mynta kam don ka jingkiew ha ka ioh ka kot ha ka jylla hynrei ka don tang ka jingkiew dor ki marbam mardih bad kane ka ktah ia ki paidbah kiba duk ba rangli jong ka jylla, lada ka don ka jingkiew ha ka ioh ka kot lada kiew dor ruh kan nym ktah palat hynrei ka ioh ka kot ka hiar katba ka jingkiew dor ka kiew kane ka ktah ia ki paidbah.
