Shillong, Naitung 13: Mynta ka sngi da ki spah ngut ki briew kila ia tuid sha ka jingialang ba la khot da ki lai tylli ki seng bhalang, ka HYNF, ka RBYF bad ka FKJGP ban pynshai halor ka lynti rel kaba ka sorkar ka kwah ban dik dik ban pynrung ha kine ki lun khasi lyngba jong ka Ri Bhoi District.
Ha kane ka jingialang ki nongkren kiba kongsan ki long Bah Sadon Blah na ka HYNF, u Bah Bipul Thangkhiew na ka RBYF bad u Bah Willberth Rani na ka FKJGP. Kine ki nongkren baroh lai ngut kila pynshai halor ka jingma lada ka wan ka lynti rel khlem da don ki lad jingiada na ka jingwan tuid kyrthep jong ki briew kiba na bar.
Kine ki lai tylli ki seng ki iieng ha ka nongrim ban pyrshah ia la lynti rel katba ka sorkar kam pat lah ban pynbiang ia ki lad jingiada na ka jingwan tuid jong ki briew kiba na bar. Ki kwah ba ka sorkar ka dei ban pynbiang shuwa ia ki lad jingiada bad sa ia kren ia ka lynti rel.
Kiwei ki nongkren kiba la kren ha kane ka sngi nalor jong kitei ki nongialam jong kitei ki lai tylli ki seng bhalang, ka long kawei ka long kmie, u wei u rangbah shnong bad u wei na ki nongmih khmat jong ka Nongpoh Town Dorbar Committee. Ia ka jingialang la pyniaid da u Bah GH Kharshanlor nongialam ka seng HNYF.
