Shillong, Iaiong 12: Ha dien ba u Commissioner Excise jong ka sorkar jylla u la pynmih ia ka hukum bay n plie ia ki dukan kyiad, na ka liang jong ka Deputy Commissioner jong ka East Khasi Hills District kala pynmih ia ki kyndon ha kaba ia dei bad ka jingplie ia ki dukan kyiad hapoh jong ka East Khasi Hills District.
Katkum ka hukum kaba la pynmih da ka Deputy Commissioner jong ka East Khasi Hills la thoh shai ba ki wine store kin plie ha ka 13 tarik haduh ka 17 tarik mynta u bnai naduh ka por 9.00 baje mynstep ha duh ka por 4.00 baje noh phai sngi.
Ha kane ka hukum ka DC kala khang ba ia ki wine store kiba don ha Police Bazar, Iewduh, ha GS Road naduh Motphran sha Sani Mandir, Mawlong Hat, Anjelee parking Lot bad Paltan Bazar ia ki la khang ban plie. Kiwei ki wine store kiba don ha kiwei ki jaka lait na kitei ki jaka kiba la kdew kilah ban plie.
Halor kane ka jingplie ia ki dukan kyiad ka DC kala kren shai ba ki trai dukan ki dei ban shim hi ia ka jingkitkhlieh ban peit ba kam dei ban don ka jinglum briew bad dei ban but ia ki kyndon kiba la bthah da ka tnad ka koi ka khiah.
Ka DC kala buh ruh ia ka kyndon ba na kawei ka iing tang u wei lah ban leit ban thied kyiad bad la khang pyrshah ba kim dei ban ia leit na kawei ka dong sha kawei pat ka dong ne ki shnong.
Ki trai dukan ki dei ban plie ia ki dukan da kaba buh khyndiat ki nongtrei bad ba ki dei ban da pynbiang ia ki jingsleh kti. La khang pyrshah ban ia lum briew ha ki dukan kyiad. La bthah ia baroh ki dukan kyiad ba kin ai ka jingiatreilang.
