Shillong, Jylliew 27: Ki saw ngut ki myntri jong ka Hima Maharam, u myntri R Ramsiej, jong ka shnong Thiepdiengngan, u myntri K Thongni myntri ka shnong Nongkynbah, Myntri M Iawphniaw ka shnong Nongpdeng Kembah bad u Myntri B W Wanniang shnong Sarin mynta ka sngi kila ai da ka jingthoh sha ka Kong Iswanda Laloo ban kyntu ban nym pynhap ia kine kitei ki saw shnong sha ka Ranikor Civil Sub Division.
Ha ka Shithi kaba la phah sha ka Deputy Commissioner jong ka South West Khasi Hills District kitei ki saw myntri kila thoh, “ngi ki khlieh nongsynshar shnong jong ki saw tylli ki shnong nakabynta ki paidbah nongshong shnong, ka shnong Thiepdiengngan, Nongkynbah, Nongpdeng Kenbah bad Sarin, ngi sngewbha ban thoh, ban ïathuh, bad ban wan ud wan nam ha khmat ka burom ba sbun jongphi, halor ki jingeh kiba ki nongshong shnong jong ngi ki mad bad ïa kynduh ha kine ki snem”.
La ong shuh shuh “kumba la kdew ha katei ka phang, ki paidbah nongshong shnong jong ngi, ki la mad bad ïa kynduh ïa shibun bah ki jingeh namar ba ngi hap ha kane ka Ranikor C & RD Block, kum ka jingpyntip ïaphi, ba ka jingjngai na ki shnong jong ngi ban poi ha ka Block Head Quarter, ha Ranikor ka long kumba 50 KM, mar shiteng ka jingjngai na ka District Head Quarter ha Mawkyrwat kaba tang 25 KM”.
Ha ka jingthoh la ong ba kane ka la ktah bha ïa ka leit ka wan bad ka ïoh ka kot jong ki paidbah nongshong shnong bad ka long ruh kaba suhsat bad kordit haduh katta-katta ban leit sha kane ka Block tang ban ïoh kali, hap ap da ki kynta-kynta bad don ki por ba duh kali la hap ban pynlut da ki hajar-hajar tyngka tang ha ka bai leit bai wan ne ka bai wai kali, ha ka ban leit ban pyndep ïa ki jingdonkam kiba bun, kum ka jingleit shim ïa ki syrnot sngikha bad kiwei-kiwei ki jingdonkam kiba bun syrtap.
Namarkata, ban weng noh ïa kine ki jingeh ba la sohkyrdot, kiba ki paidbah nongshong shnong jongngi, ki la mad mynta da ki phew-phew snem, ka long tang ban kham pynjan noh ïa ka Block Office sha u paidbah, da kaba pyllait noh ïa ki shnong jong ngi na ka Ranikor C & RD Block bad ban pynhap noh hapoh ka Mawkyrwat C & RD Block bad kumjuh ban nym pynhap ïa ki shnong jong ngi da lei-lei hapoh ka propose Ranikor Civil Sub-Division namar kitei ki jingeh kumba la kdew. La ong ki saw myntri ha ka kyrwoh kaba la phah mynta ka sngi.
