Shillong, Nailur 22: Ka kabinet mynta ka sngi kala pdiang ia ka jingai jingmut jong ka tnad khlaw jong ka sorkar jylla ban thung ia u Balbir Singh Gour u heh jong ka sorkar pdeng u ba la thait na kam ba deipeit ia ka “Wild Life Government of India” ban iarap ia ki nongrep ka jylla kumno ban thung dieng bad ban pyniaid iew ia ki dieng.
Ka sorkar jylla dang shen lyngba ka tnad khlaw kala pynioh ia ka jingpynbna sorkar ia kaba la tip kum ka Agro Forest Tree, lyngba jong kane ka sorkar kala shah ia ki paidbah nongrep ka jylla ba kin thung ia ki dieng bad ban pyniaid iew ia ki katkum ki kyndon jong ka ain khlaw. La thung ia u Gour ka long ban iarap ia ka jylla ban peit ha kaba ia dei bad ki ain.
Ban ia khaii ia ki dieng kiba la jan juh jait ka don ka ain ia kaba la tip kum ka “International Trade of Endanger spices” u la ai nuksa ba ki dieng kiba la jan duh jait ki long u Dieng Agar, u dieng Red Sandal, Sandal Wood ban pyniaid iew ia kine hap tip ia ki ain bad u Gour u long u briew ba ka sorkar India kala buh kyrpang ia u ha kane ka kam bad mynta u la shong thait, ha kaba ka sorkar jylla kala shim ia ka jingiarap ka jong u.
Ha ka juh kapor na ka liang jong u myntri rangbah ka jylla u Dr Mukul u la ong ba ka sorkar jylla kala ia kren bad ka sorkar pdeng ba kan wanrah ia ka National Agro Forest Policy khnang ban pynsuk shuh shuh ia ki nongrep ha kaba shim ia ka kam thung dieng kum ka kamrep. Ka sorkar jylla kala buh ia ka tnad rep kum ka tnad sorkar ban ai jingtip sha ki nongrep ha kaba ia dei bad kikam thung dieng.
Ka kabinet mynta ka sngi la shim ruh ia ka rai ha kaba ia dei bad kajingthung kam hapoh ka tnad khlaw haka kyrdan Assistant Conservator Forest ophisar , mynshuwa ka jingthung kam ha kane ka kyrdan ka long ha ka ration 2:1 kaba mut lai pawa ki dei lyngba ba ki hap ban pass ia ki examin bad shipawa da kaba ioh promation, da ka jingpynkylla noh ia kane ka service rule ka long ba mynta kan long noh ha ka ration 1:1 kaba mut 50% kin hap ban pass ia ka examin bad 50% da kaba ioh promation.
