U Chief Minister ba un shai kdar, ka Sixth Schedule kam shym dei kaba la pan da ka FKS

Shillong, Nohprah 15: Hadien ba ka Sorkar BJP kam shym sngap ia ki jingkyrpad jong ki jaidbynriew rit paid bad namar ba don ka jingbun paid hapoh Dorbar Parliament ki la lah ban ioh ia ka jingmynjur ia ka Citizenship Amendment Bill 2019 hapoh Lok Sabha ha ka 9 tarik December 2019 bad ka jingmynjur ha Rajya Sabha ha ka 12 tarik December 2019 bad la ioh ia ka jingsoi jong u President Ri India ha ka 13 December 2019, bad kumta ka katei kaba ngi khot paidbah ka CAB 2019 ka la long ain mynta hapoh baroh kawei ka Ri India, lait noh katto katne tylli ki jylla kiba don ILP bad ki jaka Sixth Schedule.

Kumta Ka Dorbar Federation of Khasi States ka la thoh biang mynta ka sngi 14 December 2019 sha u Conrad Sangma, Chief Minister ka jylla hadien ba iohi ba ka Sorkar MDA ki thmu ban khot ia ka Dorbar Assembly kaba shi sngi na ka bynta ka ILP bad ban kyntu ia ka Sorkar Jylla ban shim khia ban wanrah ym tang ka rai Dorbar Assembly halor ka jingkwah ban pynjari ia ki kyndon jong ka Eastern Bengal Regulation Act 1873.

Na ka liang jong ka FKS ka kyrpad ia ka Sorkar Jylla lyngba u Chief Minister ba un wanrah ruh ha katei ka juh ka sngi ia ka Resolution ka Rai Dorbar ban dawa na ka Sorkar India ban bsuh bad pynpaw shai ia ki jingiateh ki jingkular (instrument of Accession bad Annexed Agreement) kaba la soi bad mynjur ka Sorkar India bad ki Khasi States ha 17 August 1948 hapoh ka kyndon (Article) kaba kyrpang hapoh ka Constitution Ri India kum shibynta ban lait ka jingiatyngkhuh hapdeng ki Ain Ri India bad ki Ain Ri Khasi ban ka ban sa plie ia ka jingsuk hapoh kane ka Ri Khasi.

La pynsngew ha  u Chief Minister  ba ha u April 2012 ka National Commission for Schedule Tribes(NCST) ka la bthah sha ka tnad Union Ministry of Home Affairs (MHA) ba kan bsuh ia ki kyndon IOA & AA hapoh ka Constitution Ri India bad haduh kine ki sngi ka tnad MHA kam pat leh ei ei halor ka jingbthah jong ka NCST lait noh tang ban  thoh shithi sha ka Sorkar Jylla naduh ki snem 2012 bad 2014.

La pynsngew ha u Chief Minister ba un shai kdar ba ka Sixth Schedule kam shym dei kaba la pan ne dawa da ka Federation of Khais States namar la tip lupa ba katei ka Sixth Schedule kam long kaba lah ban iada ia ka Riti Dustur ka khyndew ka shiap bad khamtam ia ki kyndon IOA & AA.

Shuh shuh la pynsngew ha u Chief Minister ba naduh ba pynjari ia ka Sixth Schedule bad ka Constitution Ri India ha ka 26 January 1950 ki khun ki hajar jong ki Hima Khasi States ki la iakynduh ia ki jingeh ha kaba ka tear gas bad lathi charge kaba nyngkong ka la jia ha ka 27 tarik June 1952, bad kane ka jingiakhih ka la bteng mynta haduh 69 snem namar ka jingpynjari ia ki Ain Ri India da kaba iaid lait ia ki kyndon Instrument of Accession and Annexed Agreement kaba 17 August 1948.

La pynpaw shuh shuh ia u Chief Minister ba  Ka kyndon 5 jong ka IOA & AA ka kren shai ba ki don ki jingbatai kiba shai kdar ba ki Ain Ri India kim lah ban trei kam haoh ki Hima Khasi States kynthup  ha ki jaka Municipality of Shillong bad Cantonment  kiba la pynlait beain shabar ka Ri Khasi katkum ka para 20 Sixth Schedule namar ba ki Syiem, Lyngdoh ki Sirdar, hapoh ka Sorkar Federation of Khasi States kim shym treh ban soi ia ka dulir INSTRUMENT OF MERGER wat hapdeng ka jingpynbor kaba jur ha kitei ki snem 1947-1948.

Ki sakhi baroh ki don ba ki 25 Hima Khasi State kim shym soi ia ka Instrument of Merger bad kumta ki Ain Ri India kin hap iaid katkum ki kyndon jingiakut bad jingiateh bad ki Hima Khasi States.

La kyntu ia u Chief Minister ba Khnang ban poi sha ka thong la kyntu jur ia baroh ki 60 ngut ki MLA ban rah bad mynjur ia ka official resolution hapoh ka Dorbar Meghalaya Assembly ha katei ka Dorbar Assembly ka ba shisngi ban kyntu bad dawa na ka Sorkar India ban bsuh bad ban  pynpaw shai kdar ia ki kyndon Annexed Agreement kiba hapoh ka Instrument of Accession of 17th August 1948 kaba la soi hapdeng ka Federation of Khasi States bad ka Constitution Ri India khnang ba kan long ka lad jingiada kaba pura ka ban iada ia ngi na ki Ain kiba shyrtap kiba la dep pynjari bad kiban dang wan na ka Parliament Ri India.

Ka Dorbar Federation of Khasi States (FKS) ka kyntu jur ia baroh ki Seng Sain Pyrthei (political parties)  ban pyndep ia ki jingkular kiba ki la buh ha ki jingkular (manifesto) jong ki halor ka IOA & AA hynrei kiba shu sah kut tang kum ki jingkular bad la pynkynaw ia u Chief Minister ba ka FKS ka la iai dawa teng ia ka jingpynjari ia ka ILP ha baroh kawei ka jylla hynrei kam shym sei soh hynrei ngi sngew ioh mynsyiem haba ioh pule mynta ka sngi ia ki jingpynbna ba ka Sorkar Jylla ka thmu ban wanrah ia ka resolution halor katei ka mat ILP hynrei la dei ban wanrah ryngkat bad ka resolution halor IOA & AA.

Kumta la kyntu biang sa shisien ia u Chief Minister bad ki Myntri lyngba ka shithi mynta ka sngi ba ha katei ka Dorbar Assembly kaba kin khot kyrkieh kaba shi sngi kin wanrah resolution ym tang halor ka ILP hynrei ban wanrah ruh ka resolution halor ka Instrument of Accession and Annexed Agreement of 17th August 1948 ka ban long katkum ki jingiatgeh ki jingkular (treaty terms) bad khamtam katkum ki kyndon (san) 5 jong ka dulir Instrument of Accession da kaba buh ruh hakhmat ia ka jingpynshai jong ka Section 7 jong ka Indian Independence Act 1947.

La pan por ruh na u Chief Minister ban ia kynduh markhmat bad Ki Khlieh Nongsynshar ban ioh ia phylliew jingmut halor kitei ki jingsah kut ki kam khnang ban lait na ki jingiatyngkhuh bad ki Ain Ri India na kawei ka por sha kawei ka por mynta la 70 snem.La phah copy ia kane ka shithi sha ki MLA, MDC, MP, ki Khlieh Nongsynshar naduh Shnong, Raid haduh Hima kynthup ruh sha ki sengbhalang ba kin shim khia halor kane ka phang. La ong u Bah John Kharshiing nongai ktien ka FKS.

 

What Next?

Recent Articles

Leave a Reply

Submit Comment

*