Shillong, Lber 11: U myntri rangbah ka jylla u Conrad K Sangma, haba jubab ia ka “ Zero Hours” kaba la wanrah da u MLA jong ka Mawlai u Bah Process T Sawkmie halor ka phang bad ia dei bad ka “Income Tax” u myntri rangbah u la ong ba kane ka bynta kam hap hapoh jong ka sorkar jylla ka dei ka bynta jong ka sorkar pdeng.
Haba ia dei bad ka jingkyrpad jong u MLA ka Mawlai, na ka liang jong ka sorkar jylla kan sa pyrshang ban ia kren ia kane ka phang bad ka sorkar pdeng. La ong ba kane ka jingshah shim income tax jong ki riewlum kiba trei sha bar na ka jaka sah jong ki byn hap hapoh ki jaka jong ki riewlum ka dei kaba la don na duh bas dang kam dei kaba thymmai.
U Myntri rangbah u la ong ba ka jingdon jong ki ha ka sorkar ka long ban iada ia ki riewlum dei na kane ka daw ba u la ong ba ka sorkar kan sa ia kren bad ka sorkar pdeng wat la ka income tax kam dei hapoh jong ka sorkar jylla, hynrei kin pyrshang ban ia kren ha kaba ia dei bad kane ka bynta.
Haba wanrah ia ka mat jingiakren ha ka “Zero Hours” u MLA jong ka Mawlai u la kdew ia ka jingialang kaba la long dang shen ha Shillong, ha kaba ka tnad Income Tax kala pynshai ba wat la dei u riewlum lada u kamai bad sah ha ka jaka byn dei riewlum u hap ban siew ia ka Income Tax.
