Shillong, Naitung 01: U Pa.im Ainam Manik Syiem acting Syiem jong ka Hima Mylliem mynta ka sngi u la wan ban shimti ia ka khet Syiem hapoh jong ka Hima ha dien ba ka KHADC ka la thung ia u kum u Acting Syiem u la ong ba “Ngan ialeh ban ai ka jingshynshar kaba khuid”.
Ha kane ka jingialang pdiangburom ia u Syiem jong ka hima ki myntri kiba la kren ha kane ka sngi ki long u myntri Kharlukhi, u myntri Langstieh, u Basan Nongumlong, u Bah Thwel Manik Syiem u Syem khynnah jong ka hima Mylliem.
Na ka liang jong u Syiem u la ong ba ka bynta kaba ha khmat eh jong u mynta ka long ban lum noh kloi ia ka dorbar Hima jong ka Hima Mylliem bad la kumno kumno ka dei ban long noh ha u Nailar bad ha kaba ia dei bad ka Them Motor na ka liang jong ka Hima kan ai ka jingiatreilang bad ka sorkar bad ka KHADC ban pynkhuid ia ka.
Ka jingwan jong u Bah Ainam Manik Syiem kum u Pa,im jong ka Hima Mylliem ha dien ba ka KHADC kala weng noh ia u Pa,im Rick Nelson Syiem kum u Acting Syiem jong ka Hima bad la thung bujli noh da u Pa,im Ainam ban peit ia ka hima namar u Syiem ba pura jong ka Hima u Pa,im Lathoh Manik Syiem u don ha pdeng ka jingshitom.
Katkum ka Mylliem Shyiemship Act 2007 la iathuh ba haba u Syiem ba pura u dang don, hynrei na ki daw kiba ym lah ban kiar ka Hima ka hap ban don ia u Acting katba u Syiem ba pura um pat lah ban wan shimti ia ka kam Syiem, ha dien ba u la lah un pyntip sha ka Hima ba shimti biang ia ka kam.
