Shillong, Jylliew 10: U President ka KHNAM Youth Wing u bah Thomas Passah bad u General secretary u F Marpna mynta ka sngi kila ai da ka jingujor pyrshah ia u Vinu Sisupal Rampal sha u Chief Excutive member jong ka Khasi Hills Autonomous District Council (KHADC) u bah Titosstarwell Chyne halor ka jingkynnoh ba u tei u briew u la shim bad pyndon kam ia ka jait Pariat.
Ha ka shithi kaba la phah sha u CEM jong ka KHADC da kitei ki ar ngut ki nongialam jong ka Youth Wing kila ong ba kane ka jingujor ka long katkum ka Khasi Hills Autonomous District (Khasi Socail Custom of Lineage) Act 1997 ia kaba la pyndon kam bakla ia ka jaid “Pariat” ha kaba u tei u briew u la ai kyrteng ia la de da u “Venu Shisupal R Pariat”.
Ha ka jingujor la ong ba na ka liang jong ka seng ka kwah ban ujor sha ka KHADC pyrshah ia ka jingpyndon kam bakla jong u wei u bar jylla u ba la shim ia ka jait “Pariat” na ka bynta ban ioh jingmyntoi shimet lyngba ka kam khaii, la kynnoh ka Youth Wing jong ka party KHNAM.
Ha kane ka jingujor la ong ba une u bar jylla la juh tip kyrteng kum u “Vinu Sisupal Rampal” ki kmie ki kpa jong u baroh ar ngut ki dei ki bar jylla hynrei mynta u la pynkylla bad ai kyrteng ia lade kum u “Venu Shisupal R Pariat”. U ne u briew u dei u ba pyniaid ia ka security agency kaba kyrteng ka Colonel Shishupal Security Consultancy and Service (CSSC) ha ka jylla.
Ha kane ka jingujor sha KHADC ka Youth Wing jong ka party KHNAM kila ai lang sha KHADC iaka shithi na ka ophis U Director General of Police, Meghalaya, ha kaba la don ka kyrteng jong u ha ka sl No kaba 4.
Ki tei ki ar ngut ki nongialam jong ka KHNAM kila kam ba ki sngew dei ruh ban pyntip ba wat ki para trai jong u ki dang ai ia ka jait trai jong ki kata “Shisupal” haduh manta ka sngi, hynrei tang ma u marwei u la shim iakane ka jaitnakabynta ka jingmyntoishimet.
Ka Youth Wing jong ka KHNAM ki la ong ba kane ka jingleh ka jong u ne u briew ka long ka jingpynkhien ia ka Lineage act 1997 jong ka Council bad ka ai mynsiem ruh ia kiwei ban leh kumjuh, ka ban pynjakhlia pat ia ka jait ka khong.
Ka Youth Wing jong ka KHNAM da ka jingsngew khia halor ka jinglong kyrpang jong ka jait ka khong jong u khasi Hynniewtrep, ki pynsgnew sha u CEM jong ka KHADC bad ki kyntu ia CEM ban shim ia ki sienjam ban pynshitom ia kum kine ki jaitbriew bad ban pynduh syndon ia ka licence security ka jong u.
Ka KHADC lyngba ka jingpyntip paidbah (NO.DC.III/Genl/3/1984-2019/134 jong ka 4th November 2019, ka la pynbna ba ymlah ban shukam neshim ia ka jait ka khong khlem ka jingmynjur jong ka KHADC, bad la kyntu ruh ban ujor pyrshah ia no ia no ruh kiba leh pyrshah.
Ka seng lyngba ka shithi KHNAM(SYW)/2019/KHADC/MEMO jong ka 22 tarik October 2019 ka la pyntip shaphang kane ka jingshim jait beain jong u tei u bar jylla, hynrei haduh mynta kam pat don kano kano ka jingshimkhia na ka council.
Ka seng kam banse ban pyntip biang ia kane ka kam bad ki ap khmih lynti ia ka jingshim khia na u CEM jong ka KHADC halor kane ka jingujor, la ong u bah Thomas Passah bad u Bah F Marngar ha ka kyrwoh kaba la phah mynta ka sngi.
