Shillong, Lber 23: U myntri rangbah jong ka jylla
u Conrad K Sangma mynta ka sngi u a wan rah ia ka mang tyngka na ka bynta jong u snem 2018-2019 ha ka jingduna pisa kaba la kot sha ka T.1,150 klur tyngka. La ong ba ka jnglut kan long T.14,101 klur tyngka katba ka jingmih pat kan long tang T.12,036 klur tyngka, ka ka bun ka jinglut ia ka jingmih la ong u myntri.
Na ka liang jong u myntri u la ong ba ha kane ka snem mang tyngka ka jingsiew tang ia ka sut kala kot sha ka T.653 klur tyngka bad ka jingsiew ia ka bai bam jong ki nongtrei sorkar kiba la shnong thait kala kot sha ka T.784 klur tyngka.
Ha kaba sdang na ka liang jong u myntri rangbah u la ong ba kane ka mang tyngka jong ka sorkar MDA ha kane ka snem kaba nyngkong, kala buh ia ka thong kaba kyrpang na ka bynta ka pule puthi, ka Koit ka khiah, ki surok sha ki nongkyndong, ka Rep ka riang, bad ki jaka pynmih bam.
Haba ia dei bad ka jingpynlut phut na ka liang jong kane ka sorkar kan ialeh ban kiar , lait noh tang ia kiba don kam ia kiba ym lah ban kiar. Na ka liang jong ka sorkar kan shim ia lad ki lynti baroh kumno ban kiar na ki jingpynlut phut kiba khlem don nongrim.
Haba wan rang ia kane ka mang tyngka u myntri rangbah ka jylla u la pruod dak ia bun ki kam kiba kane ka sorkar kan leh na ka bynta ka roi ka par jong ka jylla bad u la pruid dak ruh kumno ban pynioh ia ki lad ki lynti ban pynioh pisa na ka bynta ka jylla.
Ha ba kren ha ki lad pathai khubor ha dien ba la dep ban ai ia ka jingkren mang tyngka hapoh ka iing dorbar na ka liang jong u myntri rangbah u la kren shai kdar ba ka sorkar kan betwng beit ia ki skhim jong ka sorkar, bad lada don ka jingdokoh na ka liang jong ka sorkar kan pynbeit ia kiba dang lah ban pynbeit bad kin sa pyrkhat ia kiba la thud palat.
