Shillong, Naitung 28: Ba ka jingPyrshah ia ka jingthmu tih Uranium ha kylleng ka Bri U Hynniewtrep bad haba ngi pyrshah ia ka jingtih Uranium ngi dei ban pyrshah ia kino kino ki lad ki lynti bad ki kam pynroi kiba thmu ban pynbit pynbiang khnang ban ioh tih Uranium.
Ka HYC ka kam ba ka Ministry of Road and Transports (MORT), Govt of India lyngba ka Scheme ba kyrpang kata ka Special Accelerated Road Development Programme for North East (SARDP-NE) kala thmu ban shna pynheh ia surok Nongstoin-Pambriew-Wahkaji- Mawthabah sha ka Two Lane, ka jingthmu jong kane ka surok kumba ka lapaw ha ka Notification jong ka Ministry of Road Transport and Highway, Government of India kaba 5.7.2010 kalong na bynta ka jingpynbit pynbiang ia ka surok ban tieh ia u Marpoh Khyndew Uranium na ka thain Mawthawbah, South West Khasi Hills District, Meghalaya.
Na liang jong ka KHADC, ka JACSO, South West Khasi Hills District bad kiwei ki seng bhalang ki la thoh sha ka Ministry of Road and Transports, Govt of India ban pynshai halor ka jingthmu jong kane ka surok bad kumjuh ruh halor ka Notification jong ka kaba la kren shai ba ka jingthmu ka long ban pynbit pynbiang ban tih Uranium. Na ka liang ka MORT kam shem pat la pynshai haduh mynta.
Lada ngin pdiang ia kane ka Surok mynta hakane ka dur bad ha ryngkat kane ka jingthmu, kam don jingmut shuh ia ngi ba ngin pyrshah tih uranium hadien. Kan long biej ban pyrshah hadien haba ngi la pdiang ka kane ka surok haryngkat ka kyndon ban pynkhreh tih Uranium bad kane kan dei shibynta jong ka jingjop jong ka UCIL hashwa ba kan jop lut da kaba ioh khlong ia u Uranium na Ri Khasi.
ka long kaba phylla bad kaba pynmut dur sniew ia baroh kumno ka MORT kan shna Surok Double lane sha ka shnong kaba don tang kumba 15 ne 20 ing bad ha ka jaka ba iaid kali tang 10 ne 20 tylli ha ka shi sngi, hynrei ha ki jaka ba kham long sor, ba kham bun briew bad bun kali ka MORT kam pat dep shna surok Two lane.
Lada shim ba kane ka surok kan pynsnoh ia ka Garo Hill- South West Khasi Hills – West Khasi Hill sha Assam. Ka Jing kylli ba mih ka long balei hap iaid kyllain na Wahkaji- Ranikor- Nongjri – Kulang ha jaka ban iaid na Mawieit- Kulang kaba kham jan da bun spah Kilo Meter bad ka don jingmut aiu ba kan leit kut sha Mawthabah haba ngim iaid lyngti na Mawthabah ban leit sha Ranikor ter ter sha Garo Hill.
Lada shim ba ka MORT ka ieid palat tang ia ki briew na ka Thain Umdohlun bad Mawthabah ba ka sa ai Surok Double lane, ka jing kylli ka mih pat ka long balei hap ban ieid kyrpang ia ka Mawthabah bad ka jing kylli ba ar ka long balei ka MORT kam shna wat tang ka Surok Kyndew sha bun phew tylli ki shnong ha ka juh ka thain ba haduh mynta kim pat ioh surok wat la kine ki shnong ki kham heh ban ia ka Mawthabah. Imat ka ieid Uranium ym ba ka ieid ia ki paidbah Mawthabah.
Ka HYC ka buh jingkylla don aiu ha lyndet ka jing kynshoit, ka jing ai jingmut, ka jing kyrpad bad ka jingtyrwa ai khublei kyrpang jong ka National Highway & Infrastructure Development Corporation Limited (NHIDCL) kaba dei ka Corporation hapoh ka jing pyniaid ka MORT ia u Bah Ricky Sohshang, President ka HANC bad u Chairman ka JAC on Two Lane ban leit tynruh na ka KHADC ba kan ai NOC ia kane ka surok.
Don aiu ha lyngdet ka jing kylla ktien jong ka JAC on Two Lane, ha ka meeting ha Nongstoin ki ong ki dawa na ka UCIL ba kan weng nong ia ka tender thmu tih Uranium ka UCIL hynrei ha ka meeting bad u Chief Minister ki ong ngim ia kren Uranium bad ngim ong ngi kyrshan ne pyrshah Tih uranium hynrei ngi kwah Surok Two lane ban pynsuk bad pynkhreh tih Uranium. Imat ki tip tang hadien ba ki pule ia ka tender ba hapoh ka tender la kynthup ia lang ia kaban shna surok lane imat ki la shah kynshoit, shah ai jingmut bad shah tyrwa ai khublei kyrpang na ka UCIL lada ki kyrshan ia kane ka tender.
Ka HYC ka ong baym lah shuh ban len lane burieh ia ki jingthmu buit poh jong ka Sorkar India bad ka Sorkar Jylla bad ka jingthmu kalong ban tih uranium bad shwa ban tih Uranium kin shna surok heh shwa ban pynbit pynbiang bad pynkhreh lypa . Kane ka surok kan dei nabynta ka UCIL bad kan long ka jingtim ia u paid ka Bri U Hynniewtrep. Kumta, ieng skhem ko Khun ka Bri U hynniewtrep ban pyrshah ia kane ka Surok bah kaban dei ka thliew jingtep ia u khun kari.
