Shillong, Naitung 04: Ka Extreme Underground Metal Society of Shillong(EUMSS) kan wanrah da ka kynhun tem na ri Japan kaba la tip kum ka Desecravity bad ka kynhun tem Nikrahold na Bangladesh ryngkat ki kynhun tem na ka Nongbah Shillong kum ka Pitroad bad kiwei kiwei na kylleng ka ri India ha ka tamasa rwai bad tem la buh kyrteng da ka Shillong Death Fest 2.
Ha kane ka Shillong Death Fest 2, ha kaba ki kynhun tem ne rwai ki dei ki kynhun kiba tem ia ki jingrwai kiba la tip kum ki Heavy Metal. Ia kane ka Shillong Deat Fest 2 yn pynlong ha Basketball Ground, Lachumiere ha ka 8 tarik u Naitung ha kaba la khmih lynti ba 11 tylli ki kynhun tem kin pyni ia ki rukom jingtem bad jingrwai jong ki naduh ka por 1 baje nohphai sngi.
Ki dkhot na ka EUMSS ki pynpaw ba ka jingpynlong ia kane ka tamasa ba Shisngi jong ki jingtem bad jingrwai ba la ju tip ha ka ktien phareng ‘ Heavy Metal’ ka long shi bynta ban pyni ba ki jingrwai bad jingtem ki don la ka jong ka bynta ha ka jingsngewtynnad ki nongsngap ha kylleng ka pyrthei. “Kumjuh ruh kumba ka nongbah Shillong la ju tip kum ka Nongbah jong ki jingrwai bad ki jingtem ha la ki jong ki bynta na ka liang ka Society ka khmih lynti ba ki paid riewieid jingrwai jingtem kin wan tuid ban sakhi da la ki jong ki khmat ha kane ka sngi ”, la ong u samla Kenny Kharkongngor u ba dei u President ka EUMSS u ba la pynshai ruh ba ki jingrwai bad jingtem ki don ha ka rukom bapher.
“Ngi kwah ban pynpaw ba ka Society kam don kano kano ka jingthmu ban pynlong ia kine ki tamasa kum ki tamasa kiba pyrshah ia ka imlang sahlang hynrei ngi ieng ha ka nongrim ba ki jingrwai bad jingtem ki don ha la ka jong ka jingmad ha ki shkor jong ki nongsngap lane ki nongtem jingrwai ha kylleng ki ri jong ka pyrthei”, la ong u samla Yodame Diengdoh , Secretary ka EUMSS . “ Ngim don kano ka jingkyrshan hynrei lait tang ba ki sei na ki pla jong ki ryngkat ka jingkyrshan na ki paralok parajor bad ki riewshimet”, la pynpaw u samla Mebanteiskhem Kharkongngor, Publicity Secretary ka Society. U samla Adarsh Pradhan u la pynpaw ba wat la bun ki sngew-wit bad ki jingtem Death Metal hynrei kum ka Society hi kam don kano kano ka jingthmu ban ialam bakla ia ka imlang sahlang.
