Shillong, Jylliew 24: U nongialam ka liang pyrshah u Dr. Mukul Sangma nongialam ka TMC mynta ka sngi u la leit ban jurip ia ka thain Rongara bad Siju ki jaka kiba la shah ktah jubor eh ha kane ka jingtwa khyndew na ka jingjur palat u slap ha kine ki sngi.
U Nongialam ka liang pyrshah u la leit ban jurip ia ki bynta jong ka South Garo Hills kaba la shah ktah bha ha kane ka jinglynshop ka mariang kynthup ia kito ki jaka kiba don ha khappud bad ka Bangladesh.
Kumba ka long mynta ka jaka kaba la shah ktah palat ka dei ka thain Maheshkhola bad Siju ha ka ym don lynti ban leit sha kitei ki jaka, ki don hynriew tylli ki jingkieng iaid kali kiba la shah rong, ki jingkieng iaid briew bad ki dieng post light kiba la shah ktah palat ha katei ka thain.
U nongialam ka liang pyrshah u la leit ban jngoh ia ki jaka bala shah ktah hapoh ka shong Rongara ha kaba la ai jingiarap ruh da u khaw ia kito ki briew ha katei ka shnong, u la leit jngoh ruh ia ki iing kiba la shah ktah ha kane ka jinglynshop ka mariang.
