Shillong, Naitung 18: Mynta ka sngi ka jingiakren hapdeng ki nonghikai SSA bad ka sorkar lyngba u Additional Chief Secretary u bah D.P Wahlang kala pulom namar ki nonghikai kim hun ia ka jubab namar kam shai ha kaba ia dei bad ka Tulop kaba la sah san bnai.
U bah Aristotle Rymbai haba kren ha ki dkhot jong ka seng Meghalaya SSA School Association ha dien ka jingiakynduh bad u Additional Chief secretary ba dei peit ia ka pule puthi ka jylla la ong bay m shym la lah ban ai ia ka jingkular kaba shai halor ka tulop kaba sah san bnai.
La ong ba ia ka tulop jong u snem mang tyngka 2021-2022 kaba san ar bnai T.44 klur ka dang sah bad ka tnad pla pisa, katba ia ki lai bnai ba dei jong u snem mang tyngka 2022-2023 pat ka sorkar pdeng kam pat pynlait ia ka pisa, kaei kaba la pynsngew sha ki nonghikai ka long ba ka tnad pule kala pyndep ia ka bynta jong ka bad ka sah ha tnad pla pisa.
Ha kane ka jingkren la pynsngew ba namar ba un Dr. Vijay Kumar ba dei peit ia ka pla pisa ym don ha Shillong yn dang poi mynta ka sngi bad ynda poi kin dang ia shong ban shim ia ka rai ban pyn lait ia ka pisa. Halor kane kila shim ia ka rai ban shong iakhih kyllain mungor haduh ba kin da ioh ia ka rai na ka sorkar, katba kim pat lah ban rai kin shong beit ha katei ka jaka.
La pynsngew ba ka sorkar jylla kala phah ia ka mang tyngka sha ka sorkar pdeng na ka bynta ki nonghikai SSA T.587.70 klur , ka sorkar kala pdiang ia kane bad na katei ka jingmang pisa ka sorkar pdeng kan ai T.305.84 klur bad ka sorkar jylla ka hap ban sei na lade T.33.98 klur.
Ka sorkar pdeng kala pynlait ha u snem 2021-2022 ka long T.271.71 klur na ka T.305.84 klur na ka liang jong ka sorkar jylla kala dep ban thep T.32.25 klur lada peit na kane ka jingkhein kaba la phah sha ka sorkar pdeng bad ka sorkar pdeng kala kren shai ba ia ka pisa kaba duna ka sorkar pdeng ka hap ban sei na lade.
Haba ia dei bad ka tulop jong u snem mang tyngka 2022-2023 ka dei ba sorkar pdeng kam pat pynlait sha baroh ki jylla ka Ri India,haba ia dei bad ka tulop la ong ba ka tnad pule ki dang bishar bniah bad la iathuh ba ka jylla ka dong ha pdeng ka jingduna pisa.
Haba ia dei bad ka jingdawa ba ka sorkar jylla kan mang pisa khambun na ka bynta ki nonghikai ka tnad pule kala dep phah sha ka sorkar jylla, kaei kaba la jylla ka thep ka long tang 10%, haba dei bad ka jingdawa ban ithuhnoh kum ki nonghikai sorkar, la ong ba ka sorkar kan sa thaw ia ka Education Commission ia kaba kin sa ia kren ha u Nailar mynta u snem 2022.
