Nongpoh, Iaiong 02: Ka Seng Hynñiewtrep National Movement (HNM) Sengkmie, hynnin ka sngi ka la hiar sha Kdohhati kaba don markhap bad ka Mawhati na ka bynta ka ban leit sngewlem bad ai jingiarap sha ki artylli ki longïing kiba mat ia ka lanot namar ka jingpluh ïing.
Ka jingjia ba sngewsih kala jia mynta ka taiew Sngi Nyngkong ha kaba kawei ka longïing ha shnong Kdohhati ka la shah bamduh noh ha ka ding ha ka por ar baje tam eiei janmiet. Ki briew shnong ki la pyrshang ban pyllip ia katei ka ding bad ruh ki la pyntip ia ki kali pynlip ding hynrei sniewbok pat naba ka lynti ka long kaba jngai kim shym la lah ban poi ha ka por kaba biang bad ka jingduna um ha kane ka shnong watla ki bor ba dei peit jong katei ka tnat ki la wan buh ia ki pipe um, hynrei katkum ka jingiathuh jong ki paidbah ba dei ka jingbym don um ba ha ka por ba ka ding ka la klang bad kim shym lah ban pynlip. Ha katei ka jingjia shu donbok pat ba ym don kaei kaei ka jingiap briew ne mynsaw.
Ha ka jing ia kren bad i trai ïing ka Kong Ritngenlang Nongspung, ka la iathuh ba ma ka ruh kam tip ia katei ka jingjia namar ba ka dang leit donkam sha Shillong hynrei tad haduh da lah wan phai na Shillong, ka la kyndit ynda la iohi ba ka ïing kam don shuh, la kylla dpei lut baroh.
ka kong Ritngenlang Nongspung ka don khyndai ngut ki khun, u kpa ka ïing um don shuh bad ka dei ruh ha kajuh ka por ba long ka Tresurer jong ka Balang u Blei. Ka la pynpaw ruh ba baroh ki jingdon jingem, ki mar rep mar riang kum u kba, synsar bad u sying ba don hapoh katei ka ïing ki la ingkhong lut baroh. Ka jingduh ka la kot kumba phra lakh tam eiei kynthup lang baroh kiba lah
duh noh ha katei ka jingjia.
Ka jingklang ka ding ka long kaba la I shyrkhei haduh katta katta ha kaba ka la ktah lang ruh ia ka ïing jong ka kong Iasuklang Nongspung la ong ki briew shnong ba iohi ia ka jingjia ha kaba ma ki ruh kim shym la lah shuh ban tem ia ka ding.
Ha kawei pat ka liang ka HNYF Mawhati Circle ruh ka la iohlad ban noh synñiang hynnin ka sngi sha katei ka longïing kaba la mad ia kane ka jingjia, ha kaba katei ka seng ka la noh synñiang da u khaw 1 poket bad ka pisa, la ong u Bah T Mukhim, president ka Mawhati Circle.(SP News)
