New Delhi, Jymmang 16: Ka COVID Working Group kaba la ialam da u Dr N K Arora ka la ai jingmut ban pyniar ia ka por hapdeng ki ar dose u dawai Covishield sha ka 12-16 taiew. Ia kane la pdiang da ka Sorkar India ha ka 13 tarik u Jymmang, 2021.
Ka Sorkar India ka la ai jingtip shaphang kane ka jingkylla sha ki Jylla bad ki UT. La pynkylla ruh ia ka rynsan CoWIN katkum kane ka jingkylla kaba pyniar ia ka por hapdeng ki ar dose jong u dawai Covishield sha ka 12-16 taiew.
Hynrei, ki la don katto katne ki khubor kiba ong ba ki briew ki la book lypa ia ka bynta kaba ar jong ka jingioh dawai Covishield jong ki bad ba kine ki briew ki la shah phah biang sha la iing na ki jaka ai dawai khlem da ioh ia ka bynta kaba ar jong u dawai Covishield.
La pynshai hangne ba ia ki jingpynkylla la kyntiew ha ka rynsan CoWIN. Kumta ym lah shuh ban kyntiew kyrteng thymmai online lane ha ki jaka ai kyrteng lada ka por hadien jong ka bynta kaba nyngkong jong uno uno u briew ka hap hapoh ka 84 sngi.
Shuh shuh, ki jingbook lypa ia ka bynta kaba ar jong ka jingioh dawai covishield kin iaid beit bad yn ym pyndam ia kine ha ka CoWIN. La ai jingmut ruh ia kito kiba dei ban ioh ia kane ba kin buh por baing ialade kaba hap hadien ka 84 sngi hadien ba ki la ioh ia ka bynta kaba nyngkong jong u dawai covishield.
Ka Sorkar Pdeng ka la ban biang sa shisien ha ki Jylla bad ki UT ba dei ban pyndep ia ki jing book lypa ia ka bynta kaba ar jong ka jingioh dawai covishield.
Ka tnat ka koit ka khiah jong ka Sorkar Pdeng ka la ai jingmut ia ki Sorkar Jylla bad ki UT ban bthah ia ki nongtrei ba ki dei ban ai dawai ia kum kine ki briew haba ki leit sha ki jaka ai dawai. La ai jingmut ruh ia ki ba kin pynsaphriang jingtip shaphang kane ka jingpynkylla.
