Shillong, July 2: ka jingiakynduh lang kaba ar ha kaba ia dei bad ka skhim Mahatma Gandhi National Rural Employment Guarantee Act (MGNERGA) la pynlong ha ki lai sngi lynter ha kaba bun na ki heh sorkar na kiwei ki bynta jong ka Ri India ruh kila ia poi lang. Ha ka jingialang u myntri rangbah ka jylla u Dr Mukul Sangma u la ai jingmut ban siang rong ia ki surok nongkyndong na ka skhim MGNERGA.
U myntri rangbah ka jylla haba kren ha ka jingialang kaba la long mynta ka sngi kaba dei ruh ka sngi kut u la ong ba dei ban wad ia ki lad ki lynti ba kumno ban kyntiew ia ka roi ka par ban pynlong ia ki nongkyndong ba kin kiew ha ka kamai ka jih, kumba ka long mynta kane ka skhim MGNREGA ka dei kawei na ki kam pynroi kiba la pynkylla dur ia ki nongkyndong ha ka ioh ka kot. U la pynpaw ruh ia ka jingsngewnguh ia ka tand pynroi nongkyndong jong ka sorkar pdeng kaba la kloi ban pynlait ia ka pisa ban siew bai bylla kane ka long kaba don kam ia ki jylla.
U la ong ba don kam ban wanrah ia ka jingjylla ban long ia kane ka skhim shispah sngi ba kan long ka atiar ha kaba kyntiew ia ka ioh ka kot bad lada don kam ka skhim jong ka sorkar Meghalaya ka IDBL kan long ka nongmuna bad kane ka jingiakynduh lang ka wanrah ia ki buit kiba thymmai, la ong ban a kane ka skhim la dei ban siangrong ia ki surok nongkyndong da kaba ai jinghikai ia ki committee kiba donha ki shnong, kane kam dei ban long tang ka lad ban ai kam hynrei ka dei ban long ka lad an wanrah ia ka jingkylla ha ka ioh ka kot ha ki nongkyndong.
Ka Joint Secretary, jongka tand pynroi nongkyndong ka Aparajita Sarangi ka la ong ba ka MGNREGA kala nongkylla sha ka lad ban ai ia ki lad ki lynti ban kiew ha ka ioh ka kot bad kaba sngewtynnad eh ka long ba ki committee ha ki shnong ki thaw ki don ia ka jingsngewkhia ba kane ka dei ka kam jong ki. Kane kan long ka nongmuna na ka bynta ka Ri lada ka long kaba jop ha kane ka jylla Meghalaya.
Kumba ka long la don kam ban ai jinghikai ia kumba 3793 ki samba ha kaba pyniaid ia kane ka skhim trei bylla shispah sngi, namar kumba ka long mynta ka jingeh kaba ia kynduh ka dei ba ymdon ia ki briew kiba la pyntbit kyrpang ha kane ka kam bad kane ka bynta dei ban leh kloi noh.
Katba na ka liang jong u Commissioner bad Secretary, ka tand pynroi nongkyndong jong ka jylla Meghalaya u, Sampath Kumar ha ka jingkren ka jong u u la ong ba ka jylla Meghalaya mynta ka kala jam sha u wei pat u mawjam ban pynshlur ia ki paidbah ban thung ia ki jingthung kiba khlem pyndon kam dawai. Ha kane ka jingialang la don lang ruh bun ki heh sorkar na kane ka jylla bad na kiwei ki jylla kiba la ia poi ha kane ka sngi ki long na Arunachal Pradesh, Assam, Nagaland, Mizoram, Tripura, Manipur, Sikkim, Himachal Pradesh bad Jammu & Kashmir.
