Jowai, Naitung 10: Ka AJYWO Central Body lyngba u President jong ka u Bah M H Dkhar, ka ai khublei Behdeiñkhlam ba suk ba kmen ia baroh ki khun ki hajar jong ka Ri Jaiñtia, kyrpang eh ia kito ki ba dang don ha ka Niamtre ki ba dei ban rakhe bad pyndep ia ka niam ka rukom ha kane ka Behdeiñkhlam.
Kum ka seng ka duwai kyrpad ruh ha u Blei Trai Kynrad Nongbuh Nongthaw ba lyngba kane ka Behdeiñkhlam ba mynta un kyrkhu kyrdoh ia baroh ki khun jong ka Ri Jaintia ba kin ioh ia ka met ka phad kaba koit ba khiah krat bad ruh ba kin nang roi kyrhai ha baroh ki liang naduh ka kamai ka kajih, ka ioh ka kot, ka jingnang jingstad bad ha baroh ki kam ki jam jong ki.
Ka AJYWO ka la ong ruh “To ngin rakhe ia kane ka Behdeiñkhlam da ka jingsngewrit, da ka jingtip briew tipblei bad ruh ha ryngkat ka jingsngewnguh ia U Tre-Ki-Rot Nongbuh Nongpynlong ia kiei kiei baroh namar ki jingkyrkhu jong u ia ngi baroh lang ha ka jingim jong ngi kaba man la ka sngi. “Ka Behdeiñkhlam Wa Suk Wa Kmen ia waroh hi eh ki khon ka Ri Jaiñtia”
