Shillong, Lber 26: Ki ar tylli ki seng bhalang ka HANM bad ka KSU kala pynpaw ia ka jingsngewnguh ia ka dorbar shnong Lumdiengjri halor ka jingkyndang jong ki briew kiba la wan shong beain hapoh katei shnong.
Na ka liang jong ka liang ka KSU Jaiaw Circle ka sngew ban ai jingkyrshan pura ia ka Dorbar Shnong Lumdiengjri hadien ba ngi lah iohi shai lyngba ki pathai khubor ia ka jingmih kynsan ki nongialam katei ka Shnong ka 24tarik, Lber 2022.
Ka seng ka ai jingiaroh ia ka dorbar shnong kaba la leh ia kane ka kam hapoh jingialam Rangbah Shnong bad Ka Executive committee (EC) bathymmai ban kyndang naphang ia ki barjylla kiba wan sah be-aiñ hapoh ka shnong ka thaw khlem da ioh jingbit na ka Dorbar Shnong bad khlem da lah ruh ban pynbiang ia ki kot ki sla kum ka Work Permit, Police Verification na ka jaka kaba ki wan, Trading license, Labour Licence bad kiwei kiwei ki jingdonkam.
Shuh shuh ban shu pynpaw ba kum ka seng kaba ju iai trei bad pyrshang ban tehlakam ia ka jingrung jingmih laitlan ki briew kiba nabar ka jylla hapoh ka dong ka thaiñ khamtam hapoh ka Jaiaw pyllun, kumta haba ngi iohi shai mynnin ka sngi ia ka jingshimkhia ki riewrangbah ka DS Lumdiengjri ban tehlakam hi dala ka jong ka iktiar ia ka jingioh bsuh khlieh laitlan ki briew kiba nabar hapoh ka shnong.
Ka KSU kam lah khlem da pyrto burom bad pynpaw ia ka jing sngewshngaiñ ka mynsiem, bad ngi ngeit skhem ruh ba lyngba ka jingmih shakmat ka DS Lumdiengjri ban pyni dala ki kam, kiwei ruh ki shnong kiba don hapoh Sor Shillong bad ka Bri u Hynñiewtrep kin bud nuksa ryntih lang ia katei ka lynti khnang ba kum ka seng ngin dup lah shuh shuh ban nang pynjanai ia ka mat treikam ban aiti ia u synñiang u bynhei sha kiba bun ki bynta ki ban tei ia ka longbriew manbriew bad ka Ri Hynniewtrep hi baroh kawei.
Kumta na ka liang ka KSU Jaiaw Circle ka kyntu bad pyntip sha ki paidbah nongshong shnong baroh ba ki lah ban pan ia ki jingdonkam na ki barjylla kum ki kot ki sla kum ka work permit, police verification na ka jaka ba ki wan ban pynshisha ba ki laioh jingbit ba ki lah ban trei ia kano kano ka kam katkum ka por ba lah buh bad kum ki paidbah ngi donkam ban husiar bad peitngor bha ia ka jingrung jingmih jong ki barjylla kiba wan rung hapoh ka shnong ka thaw jongngi khnang ban lait na kino kino ki jingeh ki ban mih hadien habud.
Ka HANM EKH ka ai mynsiem bad ai jing kyrshan ia ki Nongialam shnong Jong ka Durbar Shnong Lumdingjri Ka sien jam kaba ki la shim kum ka lad jingiada ia ka jingioh rung beaiñ Jong ki mynder shi sngi ban ioh rieh tngen ha ki shnong ki thaw. Kane ka jingkhynra Jong ka Durbar Shnong Lumdingjri Ka long ka Wei ka lynti ban pyntreikam ia ka ILP.
Ka seng HANM ka ong ba ki Durbar Shnong ki dei ka tynrai ba nyngkong ba don ia ka iktiar ban pyntreikam ia ka ILP wat lada ka sorkar ka mynjur noh ban pyntreikam ia ka ILP kan ym don jingmut lada ki bor shnong ki shim sting kane ka long ka nuksa .
Ka seng ka ong ba ki wei pat ki Durbar Shnong ka HANM EKH ka kyntu jur ia ki nongaiwai iing ba Kim dei ban kmen tohhoh tang ban ioh ai wai iing Sha ki bar jylla ki bymdei ki trai shnong trai jylla hynrei ki dei ban pyrkhat shwa ia ka jongshong shngaiñ, la ong u bah L Syiemsad President HANM ka East Khasi Hills District.
