Shillong, Rymphang 24: Ka Khasi Students’ Union lyngba ka Educational Cell, ka ai khublei bad kitbok kit wriang ia baroh ki samla pule ka bri u Hynniewtrep, ki ban sa iakhun ia ki Eksamin Kum ka SSLC, HSSLC bad kiwei de ki Eksamin bapher bapher ha ki khyndiat sngi ban wan.
Ka lawei ba skhem bad ba phyrnai ka shong ha ki samla ka Ri, bad kumta kum ki samla, ngi dei ban kut jingmut bad ban pynshitom ialade ban pynthikna ba baroh ki kyrdan ba sha khmat kin dei lypa ki jong ngi.
Ha kum kane ka juk jong ka thma jabieng, ka Seng ka ngeit skhem bad shaniah tylli ha ki khun samla ka Ri ba kin long ki païa ba skhem na ka bynta ka lawei.
Ka Seng, ka kyntu ia baroh ki samla pule ban trei shitom bad minot ha ki jingpule jong ki, bad khlem artatien ba ka jingtrei shitom hi kan wanrah ia ka nam ka burom, ia ka ïing ka sem, ka shnong ka thaw bad ia ka jaitbynriew hi baroh kawei. Kane ka long katkum ka kyrwoh kaba la phah da u Pynkmenlang Sanmiet Chairman Education Cell Khasi Students’ Union.
