Shillong, Nohprah 08: U myntri rangbah duh jong ka Ri India u Narendra Modi mynta ka sngi u la ai ka jingkhublei ia ki paidbah jong ka Ri India baroh kawei kiba la kyrshan met bad mynsiem ha kane ka jingiakhun pyrshah ia ki kam bamsap hapoh jong ka Ri.
La ong ka jingiakhun ka long ruh pyrshah ia ki kam lehnoh bad ia ka pisa tuh kaba la buh rieh, ha pdeng kane ka jingiakhun pyrshah ia ki jingeh kiba ka Ri ka ia kynduh kila don ruh ki jingdkhoh hangne hangtai ha kaba pynduh noh ia ki lut san spah bad lut shihajar ia kaba la shim ia ka rai da ka sorkar.
Ha ka juh ka por u myntri rangbah u kyntu ia ki paidbah ban ia siew ia tda da kaba pyndon ia ki juk stad kiba mynta ban pynmliem khlem da pyndon kam da ka pisa.
“ Nga ai ka jingiaroh ia baroh ki paidbah jong ka Ri kiba la ai ka jingkyrshan met bad mynsiem ia kane ka jingiakhun pyrshah ia ki kam bamsap, ki kam lehnoh bad ia ka pisa tuh kaba la buhrieh, kane ka rai jong ka sorkar kan iarap ia ki nongrep, ki nongkhaii, ki nongbylla kiba dei u budlum jong ka ioh ka kot jong ka Ri”.
U myntri rangbah duh u la ong “ nga la juh kren ba kaei kaei kaba ka sorkar ka leh na ka bynta ka jingbha jong ka Ri kan wanrah ruh ia ki jingeh ha ki paidbah, hynrei kane ka jingeh kan long tang khyndiat por, hynrei kan ai ka jingmyntoi pat ha ki sngi badki snem kiban dang wan, namar ka jingsah dien jong ki nongkyndong ka dei na ka daw jong ka jingbamsap.
Haba phai pat sha kane ka jingialeh ban pynkylla ia ka rukom pyndon kam ia ka pisa, U myntri rangbah duh u la ong “Kum ki paidbah jong ka Ri to ngin pdiang ia kane ka juk jingstad kaba mynta da kaba pyndon kam ha ka khaii pateng khlem da pyndon kam da ka pisa bad kane kan iarap ban pynlait na ki jingbamsap hapoh ka Ri India”.
U myntri rangbah duh u la ong ba da ka jingiatreilang kawei dei ban pynthikna ba ia ka pisa tuh dei ban kyntait bad kane kan ai bor ia ki ba duk ba rangli, ki kup shiliang sem shiliang bad kan iarap ia ki pateng ki ban dang wan la ong u myntri rangbah duh jong ka Ri ha ba ai khublei ia ki paidbah ha kane ka jingdap shibnai mynta ka sngi ia kane ka jingpynduh ia ki pisa lut san spah bad lut shihajar.
