Shillong, Jymmang 02: U Bah Himalaya Shangpliang mar ia jop kum u MLA jong ka Mawsynram u la bud dien ha kaba ia dei bad ka jingshna ia ka jingkieng ha riat Mawkhnai kaba don ha rum jong ka shnong Phlangwanbroi shuwa ban poi sha Tropleng.
Kane ka jingkieng ka dei kaba la shna mynta la ar snem ei ei ia kaba ym shym la lah ban pyndep na ka daw jong ka jingduna jong ki tiar ki tar. Ia ki nar pun jingkieng kiba dei da ki Steel ban buh ha kane ka jaka la wan wan rah na sha bar jong ka jylla bad ban pyndait ia kine nar don kam ia ki Bering kiba dang shu poi mynta.
Na ka liang jong u MLA ka Mawsynram u Bah Himalaya Shangpliang haba kren ha u SP News Agency u la iathuh ba mar ia jop kum u MLA u la bud dien ia kane ka jingkieng bad mynta ki bering kila poi bad ki briew jong ka kompeni ki ban pyntrei ia kane ka kam ruh kila poi lang ban pyntrei ia kane ka kam.
La ong ba kane ka jingkieng kaba don ha riat Mawkhnai ka long kaba don kam namar ka jingkieng kaba rim kala buh ia ki paidbah ha ka jingeh kaba khraw bad ka jingma. Na ka liang jong u MLA u ong ba un iai bud dien ia kane ka kam ba kin sdang noh ia ka jingtrei namar ka dei kaba la sah teng mynta la palat ar snem.
Ha ka juh ka por na ka liang jong u Executive Engineer jong ka Mawsynram PWD Division u la iathuh ha u SP News Agency ba ki bering kila poi bad mynta ki lah ban sdang noh ia kane ka jingtrei namar ka long ka jingkieng kaba don kam bha ha kane ka surok Balat.
