Shillong, Jymmang 09: Mynta ka sngi ka myntri ba dei peit ia ka tnad pathai khubor jong ka jylla ka Dr. M Amapreen Lyngdoh kala khot ia ka jingialang bad ka tnd pynneh pynsah riti dustur bad ka tnad shangsuwari ban ia kren halor ka jingjied jied ia ki nongleit ban ia shim bynta ha tamasa ban pyninam ia ki phlim bala tip kum ka “Cannes Film Festival” ban long ha France.
Kiba la shah jied ha kane ka jingleit ban ia shim bynta ha katei ka tamasa ki long u bah Commander Shangpliang bad u Nicholas Lemtor Kharkongor, hynrei na kadaw ba la wengnoh u bah Nicholas na kane ka jingleit ka tnad pathai khubor kala khot ia ka jingialang ban jied bujli da u wei pat.
Ha kane ka jingialang la shim ia ki ar ngut ki kyrteng u Pradip Kurbah bad u Dominic Sangma, ha kane ka jingialang na ka liang jong ka sorkar jylla kala tyrwa sha ka tnad pathai khubor jong ka sorkar pdeng ia ka kyrteng u Dominic Sangma ha ka jaka jong u bah Nicholas Lemtor Kharkongor.
Ha kane ka jingialang la shim ia ka rai ba ha ki snem ban wan ban jied ia ki briew ban leit ban mih khmat sha kum kine ki Tamasa dei ban don ia ka kommittee ban jied ia ki briew bad Chief Secretary ka jylla yn long u shongknor ka kommittee.
Halor kane ka sorkar kan sap hah da ka jingthoh sha ka tnad pathai khubor ka sorkar pdeng namar ka lah ban jied iaki briew katkum ka mon jong ki, halor kane ka tnad pathai khubor jong ka sorkar jylla kan sa ia kren ia kane hynrei kan long katkumki kyndon ba kala buh.
