Shillong, Jylliew 07: U Bah Disparsing Rani u ba ka seng lehnoh HNLC kala tyrwa ba un long u ksiang ha ka jingtrwa ia kren ia suk bad ka sorkar pdeng kum juh bad ka sorkar jylla, haba kren ha ki nongthoh khubor mynta ka sngi ha Shillong u la ong, “ Nga iohi ba ka seng HNLC ka leh politic, ngam ban se ban kyntait ia kane jingtyrwa ka seng ban long ksiang”
U Bah Disparsing u la ong ba kane ka jingbyrngem jong ka seng HNLC ia u Dr Mukul Sangma bad ban pynbethei bom ia ka Congress Bhavan, um sngew iahap lada ka seng HNLC ka kwah ban ia kren ia suk, ka dei ban long kaba iai shah ban ap.
U la ong “ Ngam kwah ban long sohpdung, lada jia ei ei ia ka sorkar u Dr Mukul yn shah peit khmat, lada u pdiang ia kane ka jinglong ksiang ban leit na kino kino ki jinghshah kynnoh ka bha ban kyntait ia kane ka jingtyrwa”.
Haba ia dei bad ka dorkhas kaba la ai sha ka sorkar pdeng kum ka seng mynta ki dang ap ia ka jubab na ka ophis jong u myntri rangbah duh jong ka Ri, ka jingiakren bad u Director General ki pulit ka long tang halor ka Dorkhas kaba ki la ai sha u Myntri rangbah duh jong ka Ri.
Haba jubab ia ka jingkylli halor ka jingong ka sorkar ba kam kwah shuh ban ia kren bad ki seng lehnoh, u Bah Disparsing, u ong ba kane ka jingkylli ka long kaba eh shisha namar lada ki lai tylli ki seng lehnoh na Garo Hills lah ban khot ia kren kaei ka jingeh ban khot ia kren ia ka seng HNLC, kane ka dei ka jingsngew jong u shimey u la ong.
U la ong ba dang shen u Joint Secretary jong ka sorkar pdeng haba kren ha ki lad pathai khubor ha Tripura, u la ong ba ka sorkar pdeng ka kloi ban ia kren lada ki sangeh noh ia ki kam pyntriem jong ki, hynrei ka long khongpong ha kaba u Dr Mukul u ong ba ym lah ban ia kren, ka sorkar kan pdiang tang ia kiba wan pyndem.
