Shillong, Nailar 19: Ka F.K.J.G.P Mawlai Circle, kala pynpaw ia ka jingsngewkhia jur halor ka jingjur palat ka jingdih drug bad ka jingkhaii drugs ha kane ka nongbah Shillong. Ban ia khun pyrshah ia kane ka kam bad ban pynsngewthuh ia ki briew ia ka jingsniew jong kane ka jingdih drug na ka liang jong ka FKJGP kan pynlong ia ka “Peace Rally” ha ka 26 tarik mynta u bnai.
U Bah Marbud Dkhar President jong ka FKJGP Mawlai u la ong ba kane ka jingdih drug ka buh ia ka imlang sah lang ha ka jingma bad ka jingjot ia ki khun samla baroh. Kane ka jingiaid paidbah kan sdang na Mawlai Nongkwar Basic School haka por 12 baje shiteng sngi bad kin pynkut ha Madan Heh stadium Phudmuri bad yn pynkut da ka jingialang paidbah.
La kyrpad ia ki paidbah ba kin wan ban ia shim bynta ha kane ka jingiaid paidbah ha kaba ki don ki nongkren na ka liang jong ki pulit, KRIPA, Meghalaya Aids Society, Sanker, VHAM ha kane ka jingiaid paidbah.
