Umsning, Risaw 15:
U Bah Banteidor Lyngdoh Chairman jong ka Traditional Medicinal Plan Board , KHADC, ha kaba kren ha ka jingpynshem ia ki nongkit kam jong ka shnat jong ka Seng Nongsumar Dawai Khasi Nylla (SNDKN) kaba la long mynta ka sngi ha Umsning, u la pynbna ba ka KHADC kan shna ia ka Institute ha Lum Sohpet Bneng ban pynneh pynsah ia ki dawai kynbat.
Haba kren ha kane ka jingialang kum u kongsan u la ong ba ha kane ka jaka kin shna ia ka kynja hospital ha kaba ki briew ki lah ban leit shah sumar. Ka KHADC ka pyrshah jur ia ka jingthmu jong ki briew kiba na shabar ban shim nongkynti ia kane ka rukom shna dawai khasi.
Ha ka juh ka por u la ong ba ka long kaei kaei kaba sngewsih ban tip ba don na pdeng jong ki ba ai dawai khasi ki khlem lang bad ki dawai pahreng, kane ka rukom leh ka long ba ki ia lehkai bad ka jingim briew. Na ka liang jong u Bah Lyngdoh u la ong ba shuwa ban die paidbah ia ki dawai hap ban da peitbniah ba ki dei kiba la shna na ki kynbat.
Ha kane ka jingkren jong u, u la ban jur ba dei ban pynneh pynsah ia ki khlaw ki btap khlem da pynjot pathar ia ki namar lada pynjot pathar kin dun noh ki dawai. Ha ka juh ka por u la ban jur ba ia ka sap ka phong kaba ki don dei ban sam pateng ha ki long dien khnang ba kane ka jingsumar kan nym duh tang shipateng briew.
Ha ka jingkren jong u Bah Albinus Lyngdoh u wei na ki EM jong ka KHADC uba la don lang ha kane ka sngi u la ong ba, kane ka kam ai dawai khasi ka dei ka sap kaba u blei u la ai. Ha kane ka sngi la plié ruh ia ka jaka shna dawai jong u Dr Philling Rynjah kaba don ha Umtrew ha Ri Bhoi District.
Ia ki nongkit kam jong ka seng SNKND la pynkshem da u Dr H Bani bad u bah Philling Rynjah u long u president na ka bynta ka Ri Bhoi District. Ha kane ka sngi da ki phew ngut ki nongkit kam jong kane ka seng ki nongaidawai khasi kiba la wan ban ia shim bynta, ha kane ka sngi la don lang ruh u Chairman jong ka Umsning Town Committee u Bah Dipul Ryntathiang bad kiwei kiwei ki riew rangbah.
Ha kane ka jingialang baroh ki nongkren kila bun jur ia kawei ka phang kata ka long ban pynneh pynsah ia ka mariang.
