Shillong, Kyllalyngkot 16: Ban sdang ban pyntrei kam ia ka Meghalaya Residence Safety and Security Act 2016, ka ophis jong ka Deputy Commissioner jong ka East Khasi Hills District mynta ka sngi kala khot ia ka jingialang ia ki rangbah shnong jong ka sor Shillong ha DC ophis.
Ka jingkhot ia kane ka jingialang ka long ban pynsngewthuh bad ban batai sha ki rangbah shnong ha kaba ia dei bad ka kane ka ain MRSSA kaba ka sorkar kan sa pyntrei kam mynta ha ka jylla baroh kawei jylla. Kane ka long ka jingsdang jong ka jingpynshai bad la khot 40 tylli ki dorbar shong kum ka jingsdang ia ka jingpynsngewthuh ia kane ka ain.
Ha kane ka sngi baroh ki rangbah shnong kiba la sha khot ha kane ka jingialang kila ia poi bad kala don ka jingiamir jingmut hapdeng ki bor jong ka District Task Force bad ki rangbah shnong, kaba bun na ki jingiakren ka dei ka jingbatai ia ka jingpyntrei kam ia kane ka ain.
U Bah RL Blah haba kren ha ki lad pathai khubor u la ong ba kane ka dei tang ka jingsdang, ha kane ka jingiakren na ka liang jong ki dorbar shnong ban pyntrei kam ia kane ki don kam ban don ia ki briew ban trei kum ka Data operator mano ban trei baroh shisngi khlem da don ka jingsiew.
Katkum ka MRSSA ka long ba ka shnong ka dei ban don ia ka bui jong baroh ki nongshong shnong, ban tip katno ki kynthei, ki shynrang bad ki khynnah, hooid don ki shnong kiba don ia ka jingbuh ia ka bui jong ki nongshong shnong hynrei don pat kim don ban leh ia kane don kam ia ka jingkyrshan pisa na ka sorkar.
La ong ba bun sien ki trai iing haba ki aiwai iing kim juh pyntip sha ka shnong, ynda la mih ka huri hura ki wan sha ka dorbar shnong kane ka buh ka jingeh ia ka shnong. La ong ba kane kan long ka jingsdang ynda la pyntrei kam yn sa sngewthuh ia kan iaid ha kano ka rukom.
